100 އަށް ވުރެ ގިނަ ވިޔަފާރިތައް ބަންދުކޮށް، ވިިޔަފާރިވެރިން މަގުމައްޗަށް ނިކުމެއްޖެ

Apr 5, 2015

ކުޅުދުއްފުށީގެ ގިނަ ވިޔަފާރިވެރިންތަކެއް އެފަރާތަކުގެ ވިޔަފާރިތައް ބަންދުކޮށް ކައުންސިލް އިދާރާ ކުރިމަތީ އިހްތިޖާޖް ފަށައިފި އެވެ.

ވިޔަފާރިވެރިން އިހްތިޖާޖް ކުރުމަށް ނިންމާފައި ވަނީ ކަރަންޓް ސަބްސިޑީ ކަނޑާލުމުން އެކަމާ ކަންބޮޑުވުން ފާޅުކޮށް ރައީސް ޔާމީނަށް ކުޅުދުއްފުށީގެ ވިޔަފާރިވެރިން ފޮނުވި ސިޓީއަށް ސަރުކާރުން މިހާތަނަށް އެއްވެސް ޖަވާބެއް ދީފައި ނުވާތީ، ކުޅުދުއްފުށީގެ ރައްޔިތުންގެ ހިޔާލް ހޯދުމަށް ރޭ ހުކުރު މިސްކިތް ކައިރީގައި ބޭއްވި ބައްދަލުވުމުގަ އެވެ.

ސްޓެއަރިން ކޮމެޓީގެ މެންބަރު ހުސެއިން އަލީ ވިދާޅުވީ މިހާތަނަށް 100 އަށް ވުރެ ގިނަ ވިޔަފާރީއެއް ބަންދުކޮށްފައިވާނެ ކަމަށާއި އެބޭފުޅުން ހަދާފައިވާ ލިސްޓްގައި ސޮއި ނުކުރައްވާ ބައެއް ވިޔަފާރިވެރިންވެސް އެކަމުގައި އެއްބާރުލެމުންދާ ކަމަށެވެ.

“ކުޅުދުއްފުށީ އޮންލައިނަށް” މައުލޫމާތު ދެއްވަމުން ހުސެއިން ވިދާޅުވީ ވިޔަފާރިވެރިން ކައުންސިލް އިދާރާ ކުރިމަތީ ތިބީ ރައީސް އޮފީހުގެ ޖަވާބެއް ލިބެންދެން ކަމަށާއި އެހެންނަމަވެސް މިހާތަނަށްވެސް ޖަވާބެއް ލިބިފައިނުވާ ކަމަށެވެ.

ސަރުކާރުގެ ޖަވާބެއް ލިބެންދެން ވިޔަފާރިތައް ބަންދުވާނެ ކަމަށާއި އިހްތިޖާޖުވެސް ކުރިއަށް ދާނެ ކަމަށް ހުސެއިން ވިދާޅުވި އެވެ.

މިހާރުވެސް ސްޓެއަރިން ކޮމިޓީގެ ބައެއް މެންބަރުން ރައީސް އޮފީހުން އެޕޮއިންޓްމެންޓަކަށް އެދިފައިވާނެ ކަމަށާއި އެހެންނަމަވެސް މިހާތަނަށް ރައީސް އޮފީހުން އަދި އެއްވެސް އިޝާރާތެއް ލިބިފައިނުވާކަމަށް ހުސެއިން ވިދާޅުވި އެވެ.

މިއަދު ބަންދުކޮށްފައިވާ ވިޔަފާރިތަކުގެ ތެރޭގައި ކުޅުދުއްފުށީގެ ބޮޑެތި ވިޔަފާރިތައް ހިމެނޭކަން ފާހަގަކޮށްލެވެ.

މިލިޔުމާއި ގުޅޭ