އިހުތިޖާޖްގައި ބައިވެރިނުވި ބޮޑެތި ވިޔަފާރިވެރިން ކުށްވެރިކުރަން: ސްޓިއަރިން ކޮމެޓީ

Apr 5, 2015

މިއަދު ކުޅުދުއްފުށީގެ ފިހާރަތައް ބަންދުކޮށް ވިޔަފާރިވެރިން ކުރި އިހުތިޖާޖްގައި ބައިވެރިނުވި ބޮޑެތި ވިޔަފާރިވެރިން ހަރުކަށި އިބާރާތުން ކުށްވެރިކުރާ ކަމަށް ކުޅުދުއްފުށީގެ ވިޔަފާރުވެރިން އުފައްދާފައިވާ ސްޓިއަރިން ކޮމެޓީގެ މީޑިޔާ ކޯޑިނޭޓަރ އާދަމް ޝަރީފް ވިދާޅުވެއްޖެއެވެ.

މި ނޫހަށް މައުލޫމާތު ދެއްވަމުން އާދަމް ޝަރީފް ވިދާޅުވީ މިއަދު ކުރި އިހުތިޖާޖަށް ރަށުގެ ބޮޑެތި ވިޔަފާރިވެރިތަކެއް އެއްބާރުލުން ނުދީވާ ކަމަށާއި އެގޮތުން “މިތުރު” ހާއްސަކޮށް ފާހަގަކޮށްލެވޭ ކަމަށެވެ.

އާދަމް ޝަރީފް ވިދާޅުވީ މިއަދުގެ އިހުތިޖާޖުގައި މުހައްމަދު ޒުހެއިރުމެންފަދަ ބޮޑެތި ވިޔަފާރިވެރިން ބައިވެރިވެފައިނުވުމަކީ ރައްޔިތުންގެ ހައްގާއި ވިޔަފާރިވެރިންގެ ހައްގުތައްވެސް ނިގުޅައިގަތުން ކަމަށެވެ.

އޭނާ ވިދާޅުވީ ކުޅުދުއްފުށީ ރައްޔިތުންގެ ނަމުގައިވެސް މިކަން ކުށްވެރިކުރާ ކަމަށެވެ.

ސްޓިއަރިން ކޮމެޓީގެ ޗެއާރމަންކަންވެސް ފުރުއްވަމުން ގެންދެވި މުހައްމަދު ޒުހެއިރުގެ “މިތުރު” ފިހާރަތައް މިއަދު ބަންދުކޮށްފައެއް ނުވެ އެވެ.

އާދަމް ޝަރީފް ވިދާޅުވީ މިހާރު ސްޓިއަރިން ކޮމެޓީގެ ގިނަ ފަރާތްތަކެއް އިސްތިއުފާ ދެއްވާ ގެއަށް ގޮސްފައިވާ ކަމަށާއި ސްޓިއަރިން ކޮމެޓީ މިހާރު ހިންގަމުންދަނީ އޭނާ ކަމަށެވެ.

މިއަދު ކުޅުދުއްފުށީގެ 100އަށް ވުރެ ގިނަ ވިޔަފާރިތައް ބަންދުކޮށްފައިވެ އެވެ.

މިލިޔުމާއި ގުޅޭ