“އެންމެފަހު ވިންދާ ޖެހެންދެން” ތިލަދެކުނުސިނަމާގައި އަޅުވަނީ

ދިވެހި ފިލްމް “އެންމެ ފަހު ވިންދާ ޖެހެންދެން” ބުރާސްފަތި ދުވަހުގެ ރޭ ތިލަދެކުނު ސިނަމާގައި އަޅުވަން ތައްޔާރުވެއްޖެ އެވެ.

ފިލްމްގެ ޓިކެޓް “ޓޫ އެޗް ޓޫ” ފިހާރައިން 75 ރުފޔާއަށް ވިއްކަމުންދާއިރު މި ފިލްމްގެ އަޅުވަން ހަމަޖެހިފައިވަނީ އެންމެ ޝޯވއެކެވެ. ނަމަވެސް އެއް ޝޯވ ފުރިއްޖެނަމަ ދެވަނަ ޝޯވއެއްވެސް އަޅުވާނެ ކަމަށް އެ ފިހާރައިން މައުލޫމާތުދިނެވެ.

އަލީ މުހައްމަދު (މޮގާ) ޕްރޮޑިއުސްކޮށްފައިވާ ލޯބީގެ އަސަރުގަދަ މި ފިލްމުން މަޝްހޫރު ޑައިރެކްޓަރ އަދި އެކްޓަރ އަހުމަދު ނިމާލްގެ ދަރި ޖުމައްޔިލް ނިމާލް ފެނިގެންދާނެ އެވެ. މީގެއިތުރުން މަރިޔަމް މުޖުދާ، ދޮން އައްޔަ، މުހައްމަދު މަނިކް އަދި ޝީލާ ނަޖީބުވެސް މި ފިލްމުން ފެނިގެންދާނެ އެވެ.

“އެންމެފަހު ވިންދާ ޖެހެންދެން” މި ފިލްމަކީ މަހުދީ އަހުމަދުގެ ވާހަކައެއްގެ މައްޗަށް ބިނާކޮށް ހަދާފައިވާ ފިލްމެކެވެ. އަދި މި ފިލްމް ޑައިރެކްޓްކޮށްފައިވަނީ އަލީ ޝިފާއު (ޗިއްޕެ) އެވެ.