ށ ގޮއިދޫ އަދި މާއުނގޫދޫގައި ކުނި މެނޭޖްކުރާ ނިޒާމް ގާއިމްކުރުގެ އެއްބަސްވުމުގައި ސޮއިކޮށްފި

ށ ގޮއިދޫ އަދި މާއުނގޫދޫގައި ކުނި މެނޭޖު ކުރާ މަރުކަޒުތަކެއް ގާއިމު ކުރުމަށް އެންވަޔަރަމަންޓް މިނިސްޓްރީ ބަޔަކާއި ހަވާލުކޮށްފިއެވެ.

މިއަދު އެންވަޔަރަމަންޓް މިނިސްޓްރީގައި އޮތް ހާއްސަ ރަސްމިއްޔާތެއްގައި މި ދެ ރަށުގެ ކުނި މެނޭޖް ކުރުމުގެ މަސައްކަތް ހަވާލުކޮށްފައިވަނީ އައިއެސްއެފް ކޮންސްޓްރަކްޝަން އާއެވެ. އެކުންފުނީގެ ފަރާތުން އެއްބަސް ވުމުގައި ސޮއި ކުރައްވާފައިވަނީ އިބްރާހިމް ޝަރީފެވެ. އަދި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަމެންޓް އެންޑް އެނާޖީ ތޯރިގް އިބުރާހީމްއެވެ.

416،691 ރުފިޔާގެ ބަޖެޓާކާއެކު އަންނަ އޮގަސްޓް މަހުގެ 8 ގެ ކުރިން ށ މާއުނގޫދޫގެ ކުނި މެނޭޖް ކުރުމުގެ މަސައްކަތް ފެށުމަށް ހަވާލުކޮށްފައިވާއިރު ށ ގޮއިދޫގެ ކުނި މެނޭޖްކުރުމުގެ މަސައްކަތްވެސް އަންނަ އޮގަސްޓް މަހުގެ 8 ވަނަ ދުވަހުގެ ކުރިން ފަށަންޖެހެއެވެ. މި މަސައްކަތް ހަވާލުކޮށްފައިވަނީ 811،682 ރުފިޔާގެ ބަޖެޓަކާއެކުއެވެ.

މި ދެ ރަށުގެ އިތުރުން ގއ ގެމަނަފުށި އަދި ގދ މަޑަވެލި ގައިވެސް ކުނި މެނޭޖްކުރުމުގެ މަސައްކަތް ފެށުމަށް މިއަދު ވަނީ ބަޔަކާ ހަވާލުކޮށްފައެވެ.

މިއަދު ހަވާލު ކުރެވުނު ޕްރޮޖެކްޓަކީ ޖުމްލަ 2.9 މިލިއަން ރުފިޔާގެ ޕްރްޖެކްޓެއް ކަމަށް މިނިސްޓަރ ތޯރިޤް ވިދާޅުވިއެވެ.