ދިއްދޫއިން ހައްޔަރުކުރި މީހުންގެ މައްސަލަ ބައިނަލްއަގްވާމީ ޖަމިއްޔާތަކަށް ހުށައަޅައިފި

ރައީސް ނަޝީދު ދޫކޮށްލުމަށް ގޮވާލާ ދިއްދޫގައި އިހުތިޖާޖް ކުރި 4 މީހުންގެ މައްސަލަތައް ބައިނަލްއަގްވާމީ ޖަމިއްޔާތަކާ ހިއްސާކޮށްފައިވާ ކަމަށް އެމްޑީޕީ ދިއްދޫ ދާއިރާއިން ބުނެފިއެވެ.

އެމްޑީޕީ ދިއްދޫ ދާއިރާގެ ސެކްޓްރީ ޖެނެރަލް އަލީ ހާޝިމް ވިދާޅުވީ މި 4 މީހުންގެ މައްސަލަ މިހާރު އޭޝިއަން ސެންޓްރަލް ހިއުމަން ރައިޓްސްއަށާއި އެމްއެސްޕީ އިންޓަނޭޝަނަލް އަށް ހުށައަޅާފައިވާ ކަމަށެވެ. މި ދެ ޖަމިއްޔާއަކީވެސް އިންސާނީ ހައްގުތަކަށް މަސައްކަތްކުރާ ބައިނަލްއަގްވާމީ ބޮޑު ދެ ޖަމިއްޔާއެވެ.

އަލީ ހާޝިމް ވިދާޅުވީ މި މައްސަލަ ބޭރުގެ ޖަމިއްޔާތަކަށް ހުށައަޅަންޖެހުނީ ރާއްޖޭގެ މިފަދަ ޖަމިއްޔާތަކަށް އިތުބާރު ނުކުރެވޭތީ ކަމަށެވެ. އަދި މި މައްސަލަތައް އދ އާ ހަމައަށް ގެންދިއުމަށް މަސައްކަތްކުރަމުންދާ ކަމަށްވެސް ހާޝިމް ވިދާޅުވިއެވެ.

އިއްޔެ ދިއްދޫއިން ހައްޔަރުކޮށްފައިވަނީ މިނިވަން 50 ފާހަގަކުރުމަށް ބޭއްވި މިޒިކް ޝޯވގެ ތެރޭގައި ބެނާ ހިފައިގެން ރައީސް ނަޝީދު ދޫކޮށްލުމަށް އަޑުއުފުލި 4 މީހެކެވެ.

ފުލުހުން ހައްޔަރުކޮށްފައިވަނީ ހއ ދިއްދޫ އޯސަންވާދީ އަބުދުﷲ ވަހީދު، ހެޕީސްޓަރ އަހުމަދު ސައީދު، ރެޑްރޯސް އަހުމަދު ރަޝީދު އަދި ސުވޭދާމަންޒިލް އަލީ އަހުމަދެވެ.

މީގެތެރެއިން އަބުދުﷲ ވަހީދު ބަންދަށް މިހާރު ވަނީ 7 ދުވަސް ޖަހާފައެވެ. އޭނާގެ ބަންދުގެ މުއްދަތު ޖެހާފައިވަނީ ހޯރަފުށީ މެޖިސްޓްރޭޓް ކޯޓުންނެވެ.