ކުޅުދުއްފުށީގައި ބޫޓާއި ދަބަސް ހަދަން ދަސްކޮށްދޭ ކޯހެއް ފަށަނީ

ރޯޒް ފެޝަންގެ ފަރާތުން ކުޅުދުއްފުށީގައި ބޫޓާއި ދަބަސް ހަދަން ދަސްކޮށްދޭ ކޯހެއް އަންނަ މެއި މަހު ފެށުމަށް ހަމަޖެހިފައިވާ ކަމަށް އެ ފަރާތުން ހާމަކޮށްފި އެވެ.

ރޯޒް ފެޝަންގެ ފަރާތުން ޖުމްލަ 4 ކޯހެއް ފެށުމަށް ހަމަޖެހިފައިވާއިރު ބޫޓް އަދި ދަބަސް ހަދަން ދަސްކޮށްދޭ ކޯހުގެ އިތުރުން ދެން ކުރިއަށް ގެންދަން ހަމަޖެހިފައިވަނީ ފަހަން ދަސްކޮށްދޭ 3 ކޯހެކެވެ.

ކުޅުދުއްފުށި އޮންލައިނަށް” މައުލޫމާތު ދެއްވަމުން މިކަމުގައި އިސްކޮށްއުޅޭ އައިމިނަތު އަޒްލާ ވިދާޅުވީ ބޫޓް އަދި ދަބަސް ހަދަން ދަސްކޮށްދޭ ކޯހަކީ 15 ދުވަހުގެ ކޯހެއް ކަމަށާއި މި ކޯހުގައި ކުޑަކުދިން އަދި ބޮޑެތި މީހުންނަށް ހުރިހާ އިވެންޓަކާ ގުޅޭނެ ބޫޓް އަދި ދަބަސް ހަދަން ދަސްކޮށްދެވޭނެ ކަމަށެވެ. މި ކޯހުގެ އަގަކީ 1500ރ. އެވެ.

އަޒްލާ ވިދާޅުވީ މި 4 ކޯހުގައިވެސް ކިޔަވައި ދިނުމަށް ހަމަޖެހިފައިވަނީ ރޯޒް ފެޝަންގެ ބޭފުޅުން ކަމަށެވެ.

އެގޮތުން ފަހަން ދަސްކޮށްދޭ ބޭސިކް ކޯހުގައި، ފަހަން އެއްވެސް ވަރަކަށް ނޭނގޭ ކުދިންނަށް ފަހަން ދަސްކޮށް ދެވޭނެ ކަމަށް އެފަރާތުން މައުލޫމާތު ދެއެވެ. މި ކޯހުގެ އަގަކީ 1500ރ. އެވެ. އަދި އިންޓަރ މީޑިއަޓް ކޯހުގައި ކޮންމެވެސް ވަރަކަށް ފަހަން ދަންނަ ކުދިންނަށް އަމިއްލައަށް، ހެދުމުގެ މިންނަގަން ދަސްކޮށްދީ ޕާޓީ ހެދުން، ގަމީސް އަދި ފަޓުލޫނުް ފަހަން ދަސްކޮށްދެވޭނެ އެވެ. މި ކޯހުގެ އަގަގީ 1700ރ. އެވެ.

އެޑްވާންސް ކޯހުގައި ވެޑިން ޑްރެސް، ޕާޓީ ޑްރެސް، ކޯޓު ފަޓުލޫނުް، ދިވެހި ލިބާސް އަދި ދިގު ހެދުން މިންނަގައި ފަހަން ދަސްކޮށްދެވޭނެ އެވެ. މި ކޯހުގެ އަގަކީ 2000ރ. އެވެ.

މި 3 ކޯސް ކުރިއަށް ގެންދިއުމަށް ހަމަޖެހިފައިވަނީ 1 މަސް ދުވަހުގެ މުއްދަތަށް މި ފެށޭ މެއި މަހު އެވެ.

ކޯހުގައި ބައިވެރިވުމަށް އަދި އިތުރު މައުލޫމާތު ސާފުކުރެއްވުމަށް 7444933 ނަންބަރާ ގުޅުއްވުމުން މައުލޫމާތު ސާފުކުރެއްވޭނެ އެވެ.