ވައިކަރަދޫގައި ފުލުހުންގެ މަރުކަޒެއް ގާއިމުކުރުމަށް މަޝްވަރާކޮށްފި

ހދ ވައިކަރަދޫގައި ފުލުހުންގެ ހިދުމަތް ދާއިމީ ގޮތެއްގައި ފަށައި ފުލުހުންގެ މަރުޒަކެއް ގާއިމްކުރުމަށް ކުރެވެންހުރި ކަންކަމާ ބެހޭގޮތުން ވައިކަރަދޫ ކައުންސިލްގެ މެމްބަރުންނާ ވައިކަރަދޫ ދާއިރާގެ މަޖިލިސް މެމްބަރު ފުލުހުންގެ އިސްވެރިންނާ ބައްދަލުކޮށް މަޝްވަރާ ކޮށްފިއެވެ.

ވައިކަރަދޫ ކައުންސިލްގެ އެދިވަޑައިގަތުމާއެކު ޝަހީދު ހުސައިން އާދަމް ބިލްޑިންގުގައި މިއަދު އޮތް ބައްދަލުވުމުގައި މަޝްވަރާ ކޮށްފައިވަނީ ވައިކަރަދޫގައި ފުލުހުންގެ ހިދުމަތް ގާއިމް ކުރުމުގައި މިހާރު ހުރި ކަންކަން ހައްލުކޮށް ދެފަރާތް ގުޅިގެން މިކަމަށް އަމަލީ ސިފައެއް ގެނެވޭނެ ގޮތްތަކާ ބެހޭގޮތުންނެވެ.

މި ބައްދަލުވުމުގައި ވާހަކަ ދައްކަވަމުން ވައިކަރަދޫ ކައުންސިލްގެ ރައީސް އިބުރާހިމް މުހައްމަދު ވިދާޅުވީ ވައިކަރަދޫގައި ކުށުގެ ވެށި ދުވަހުން ދުވަހަށް ބޮޑުވެ މަސްތުވާތަކެތި ބޭނުން ކުރުމާ މުދަލަށް ގެއްލުންދިނުމުގެ މައްސަލަތައްވެސް ކުރިމަތިވަމުން އަންނަ ކަމަށާއި އެހެންކަމުން އެފަދަ ކުށްތަކުން ރަށުގެ މުޖުތަމައު ސަލާމަތް ކުރުމަށް ކައުންސިލުން އިސްކަންދީގެން މަސައްކަތް ކުރައްވާ ކަމަށެވެ.

ކޮމިޝަނަރ އޮފް ޕޮލިސް ހުސެއިން ވަހީދު ވިދާޅުވީ ވައިކަރަދޫގައި ފުލުހުންގެ ހިދުމަތް ގާއިމް ކުރުމަކީ ފުލުހުންގެ މުއައްސަސާއިންވެސް އިސްކަން ދެއްވާ ކަމެއް ކަމަށާއި އެކަމަށް ކުރެވެން ހުރި މަސައްކަތްތައް ކޮށްދެއްވާނެ ކަމަށެވެ. އަދި ވައިކަރަދޫގެ ކުށުގެ ވެށި ނައްތާލައި ރައްޔިތުންނަށް ރައްކާތެރިކަން ކަށަވަރު ކުރުމަށް މަސައްކަތް ކޮށްދެއްވާނެ ކަމަށާއި ވައިކަރަދޫ ސްކޫލުގެ ދަރިވަރުންނާ ބެލެނިވެރިންނަށް އަދި ޒުވާނުންނަށް ބައިވެރިވެވޭގޮތަށް ހަރަކާތްތަކެއް ހިންގަވައި ދެއްވަވާނެ ކަމުގައިވެސް ކޮމިޝަނަރ އޮފް ޕޮލިސް މި ބައްދަލުވުމުގައި ވިދާޅުވިއެވެ.

މިއަދުގެ ބައްދަލުވުމުގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު މުހައްމަދު ނާޒިމް ވިދާޅުވީ ފުލުހުންގެ ހިދުމަތް ތަރައްގީކޮށް ކުރިއެރުވުމަށް ބޭނުންވާ ކަންކަން ފުރިހަމަ ކުރުމުގައި މަޖިލީހުގެ ތެރެއިން ދޭންޖެހޭ އެހީތެރިކަމާ އެއްބާރުލުން ދެއްވާނެ ކަމަށާއި މިހާތަނަށްވެސް އެގޮތަށް މަސައްކަތް ކޮށްފައިވާނެ ކަމަށެވެ.

މިއަދުގެ ބައްދަލުވުމުގައި ކޮމިޝަނަރ އޮފް ޕޮލިސް ހުސައިން ވަހީދު އާއި ޑެޕިއުޓީ ކޮމިޝަނަރ އޮފް ޕޮލިސް މުހައްމަދު ސާދިގު އާއި އެސިސްޓެންޓް ކޮމިޝަނަރ އޮފް ޕޮލިސް ފަރުހާދު ފިކުރީ އާއި ޑިވިޜަނަލް އޮޕްރޭޝަންސް ކޮމާންޑުގެ ސައުތު ވިންގުގެ ހެޑް ސުޕްރިންޓެންޑެންޓް އޮފް ޕޮލިސް އާސިމް އަބްދުﷲގެ އިތުރުން ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު މުހައްމަދު ނާޒިމް އާއި ވައިކަރަދޫ ކައުންސިލްގެ ރައީސް އާއި ނައިބްރައީސް އަދި ޒިންމާދާރު ވެރިޔާ އާއި ކައުންސިލްގެ މެމްބަރުން ބައިވެރިވިއެވެ.