މަސައްކަތާ ގުޅުން ނެތް ބަޔާންތައް ނެރޭ ކައުންސިލްތަކާ މެދު ފިޔަވަޅު އަޅަން ނިންމައިފި

ކައުންސިލްތަކުގެ މަސައްކަތްތަކާ ގުޅުން ނެތް ނޫސް ބަޔާންތައް ނެރޭ ކައުންސިލްތަކާ މެދު ފިޔަވަޅު އެޅުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ނިންމައިފި އެވެ.

އެލްޖީއޭގެ އޮފިޝަލަކާ ހަވާލާދީ މިއަދު “ހަވީރު އޮންލައިން” ގައި ބުނެފައިވަނީ މިގޮތަށް ނިންމާފައި ވަނީ އެލްޖީއޭގެ ބޯޑު މެމްބަރުންގެ ބައްދަލުވުމެއްގައި މަޝްވަރާކުރުމަށް ފަހު ކަމަށެވެ. އެކަމަކު ކައުންސިލްތަކާ މެދު އަޅާނީ ކޮން ފިޔަވަޅެއްތޯ އެ ބައްދަލުވުމުގައި ނިންމާފައި ނުވާ ކަމަށް އޭނާ ވިދާޅުވި އެވެ.

އެލްޖީއޭ އިން ބުނިގޮތުގައި ކައުންސިލްތަކުގެ މަސައްކަތްތަކާ ގުޅުން ނެތް ކަންކަމުގައި ނޫސް ބަޔާން ނުނެރުމަށް ހޯމް މިނިސްޓަރު އަދި އެލްޖީއޭގެ ރައީސް މިހާރު ވަނީ ކައުންސިލްތަކުގައި އެދިވަޑައިގެންފަ އެވެ.

ލާމަރުކަޒީ ގާނޫނުގައި ބުނެފައިވާ ގޮތުގައި، ކައުންސިލްތަކުގެ ޒިންމާއަކީ ރަށާއި އަތޮޅުގެ ތަރައްގީ ޕްލޭންތަކާއި މަޝްރޫއުތައް ރޭވުމުގައި ރައްޔިތުންގެ ހިޔާލާއި މަޝްވަރާ ކަމާ ބެހޭ ފަރާތްތަކަށް ދިނުމާއި ރައްޔިތުންނާ ވީހާ ވެސް ގާތުން ހިދުމަތްތައް ފޯރުވައިދިނުމެވެ.

މަސައްކަތްތަކާ ގުޅުން ނެތް ނޫސް ބަޔާން ނެރޭނަމަ ފިޔަވަޅު އަޅަން ނިންމާފައި މިވަނީ ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ދައުވާކޮށް ހައްޔަރުކުރުމާ ގުޅޭގޮތުން ޝަރުއީ ދާއިރާ އަށް ފާޑުކިޔައި އެމަނިކުފާނު ދޫކޮށްލަން ގޮވާލައި، އެމްޑީޕީގެ މެޖޯރިޓީ އޮންނަ ގިނަ ކައުންސިލްތަކުން ބަޔާން ނެރެފައި ވަނިކޮށެވެ. އަދި ކަރަންޓް ސަބްސިޑީ ދިނުމުގައި ސަރުކާރުން ގެންގުޅޭ އުސޫލަށް ފާޑުކިޔައި ވެސް ބައެއް ކައުންސިލްތަކުން ބަޔާން ނެރެފައިވެ އެވެ.