އޭސީސީއިން ކުޅުދުއްފުށީގައި ގިނަ ހަރަކާތްތަކެއް ހިންގަނީ

އެންޓިކޮރަޕްޝަން ކޮމިޝަންގެ ދުވަހު ފާހަގަ ކުރުމުގެ ގޮތުން އެކޮމިޝަނުން ކުޅުދުއްފުށީގައި ގިނަ ހަރަކާތްތަކެއް ހިންގުމަށް ހަމަޖެހިފައިވާ ކަމަށް އެފަރާތުން ވިދާޅުވެއްޖެ އެވެ.

އެގޮތުން ސްކޫލް ކުދިންނަށް ބާއްވާ ހާއްސަ އެވެއާނެސް ޕްރޮގްރާމްތަކެއް މިއަދު ކުރިއަށް ގެންދިއުމަށް ހަމަޖެހިފައިވާނެ ކަމަށް އެފަރާތުން މައުލޫމާތު ދެއެވެ.

ކުޅުދުއްފުށީ އަފީފުއްދީން ސްކޫލާއި ޖަލާލުއްދީން ސްކޫލްގެ ދަރިވަރުންނަށް އަމާޒުކޮށްގެން މިއަދު ކުރިއަށް ގެންދިޔަ އެވެއާނެސް ސެޝަންގެ ތެރެއިން މައުލޫމާތު ދެވިގެންދާނީ ނަޒާހަތްތެރިވުމާ ބެހޭގޮތުންނެވެ.

އަފީފުއްދީން ސްކޫލް އަދި ގައުމީ އިދާރާގައި މި ޝެސަންތައް ކުރިއަށްގެންދިއުމަށް ހަމަޖެހިފައިވަނީ މިއަދު 2:30 އެވެ.

ސްކޫލުތަކުގެ ދަރިވަރުންނަށް ކުރިއަށް މައުލޫމާތު ދިނުމަށް އޭސީސީއިން ބޭއްވި ހަރަކާތެއް–

އޭގެއިތުރުން އެންޓިކޮރަޕްޝަން ދުވަސް ފާހަގަ ކުރުމުގެގޮތުން ކުޅުދުއްފުށީ ބަނދަރު ސަރަހައްދުގައި އެންޓި ކޮރަޕްޝަން ދުވަހުގެ ރަމްޒީ ހަނދާނެއްގެ ގޮތުގައި މޮނިއުމެންޓެއް ހުޅުވުން މާދަމާ 8:30 ގައި އޮންނާނެ އެވެ. މި ރަސްމިއްޔާތުގައި ސަރުކާރު މުއައްސަސާތަކުގެ ބޭފުޅުންނާއި ކައުންސިލްގެ އިސްވެރިން ބައިވެރިވުމަށް ހަަމަޖެހިފައިވާ ކަމަށް އެސީސީ މައުލޫމާތު ދެއެވެ.

އެންޓިކޮރަޕްޝަން ދުވަހުގެ ފާހަގަކުރުމަށް މާދަމާ ރޭ އަފީފުއްދީން ސްކޫލުގައި ހާއްސަ ޖަލްސާއެއް ބޭއްވުމަށް ވަނީ ހަމަޖެހިފަ އެވެ. މި ޖަލްސާގައި އެ ކޮމިޝަންނުން އިންތިޒާމްކޮށްގެން ކުރިއަށް ގެންދިޔަ ޕޯސްޓަރ ކުރެހުމުގެ މުބާރާތާއި ކުއިޒް ކޮމްޕެޓިޝަނުން ވަނަވަނައަށް ދިޔަ ދަރިވަރުންނާއި ސްކޫލްތަކަށް އިނާމު ދިނުން އޮންނާނެ އެވެ.

މުވައްސަސާތަކަށް ނަޒާހަތެރިކަމާ ބޭހޭ ގޮތުން އޭސީސީއިން ކުރިއަށް ގެންދިޔަ ހަރަކާތެއް–

އަދި 22 ވަނަދުވަހު ޝެއިހް އިބްރާހިމް އަހުމަދުގެ ވަރަށް ހާއްސަ ދަރުހެއް ބޭއްވުމަށް ހަމަޖެހިފައިވާ ކަމަށް އޭސީސީން މައުލޫމަތު ދެއެވެ. މި ދަރުހުގައި މައުލޫމާތު ދިނުމަށް ހަމަޖެހިފައިވަނީ “ލައުނަތަ ދުރުވުމާއި” ބެހޭގޮތުންނެވެ. އަދި 23 ވާ ބުރާސްފަތި ދުވަހު ކުޑަކުދިންނަށް ހާއްސަކޮށް ކުޑަކުދިންގެ ހަވީރެއް ބޭއްވުމަށް ހަމަޖެހިފައިވާ ކަމަށްވެސް އެފަރާތުން މައުލޫމާތު ދެއެވެ.