ބީއެމްއެލް އިން ދޫކުރާ ހޯމް ލޯނަށް ބަދަލުތަކެއް ގެނެސްފި

Apr 21, 2015

ގިނަ ކަސްޓަމަރުންނަށް ލޯނުގެ ފުރުސަތު ހޯދައިދިނުމަށާއި އަދި ފުޅާ ދާއިރާއެއްގައި ގެދޮރު ގަތުމުގެ ފުރުސަތު ހޯދައިދިނުމުގެ ގޮތުން ބީއެމްއެލް އިން ދޫކުރާ ބީއެމްއެލް ހޯމް ލޯނަށް ބަދަލުތަކެއް ގެނެސްފިއެވެ.

ބީއެމްއެލް ހޯމް ލޯނަށް ގެނައި ބަދަލާއި އެކު މިހާރު ރާއްޖޭގެ ކޮންމެ ހިސާބަކުން ފްލެޓް، އެޕާޓްމަންޓް، ރޯ ހަައުސް ނުވަތަ ސިންގަލް ޔުނިޓް ކޮންޑޮމީނިއަމް އެޕާޓްމަންޓެއް ގަތުމަށް ނުވަތަ އެފަދަ ތަނެއް ގަތުމަށް މިހާރު ނަގާފައިވާ ލޯނު ބީއެމްއެލްއަށް ބަދަލުކުރުމުގެ ފުރުސަތު ކަސްޓަމަރުންނަށް ލިބިގެންދާނެއެވެ.

އަދި މީގެ ކުރިން މާލެ ނުވަތަ ހުޅުމާލޭގައި އަމިއްލަ ނަމުގައި ގެދޮރު ހުރި ފަރާތްތަކަށް ހޯމް ލޯނަށް އެދި ހުށަނޭޅުނުކަމުގައި ވީ ނަމަވެސް މިއަދު މި ގެނެވުނު ބަދަލުތަކާއެކު އަމިއްލަ ނަމުގައި ގެއެއް ރަޖިސްޓްރީކޮށްފައިވާ ފަރާތްތަކަށްވެސް ހޯމް ލޯނަށް އެދި ހުށަހެޅުމުގެ ފުރުސަތު ލިބިގެންދާނެއެވެ.

އޭގެ އިތުރުން ހޯމް ލޯނު މެދުވެރިކޮށް 15 މިލިއަން ރުފިޔާއަށްވުރެ އަގު ބޮޑު ތަނެއް ނުގަނެވޭނެ ގޮތަށް ކުރިން އޮތް ނަމަވެސް މިހާރު ހޯމް ލޯން މެދުވެރިކޮށް ކޮންމެ އަގެއްގައި ހުރި ތަނެއް ވެސް ގަތުމުގެ ފުރުސަތު ލިބިގެންދާނެއެވެ.

ބީއެމްއެލް އިން މިހާރު ދޫކުރަމުން މިގެންދާ ހޯމްލޯން އެއްކޮށް ރުފިޔާ ދައްކާ ހަލާސްކުރުމަށް 20 އަހަރުގެ މުއްދަތެއް ލިބިގެންދާނެ އެވެ. އަދި ކަސްޓަމަރުންނަށް ލޯނު ލިބޭނެ ފުރުސަތު ހޯދައި ދިނުމަށް ބޭނުންވާކަން ބޭންކުން ހާމަކުރިތާ ކުޑަ ދުވަސްކޮޅެއްތެރޭގައި ބޭންކުންވަނީ ލުއި އެކްސްޕްރެސް ލޯނަށް ހެޔޮ ބަދަލުތަކެއް ގެނެސް އިތުރު ކަސްޓަމަރުންނަށް ލޯނު ލިބޭނެ ފުރުސަތު ހުޅުވާލާފައެވެ.

މިލިޔުމާއި ގުޅޭ