އެކަށީގެންވާ ތަރުހީބެއް ނުލިބުމުން ކުޅިވަރު ކޯޓުތައް ތަރައްގީ ކުރުމުގެ މުއްދަތު އިތުރުކޮށްފި

އެކަށީގެންވާ ތަރުހީބެއް ނުލިބުމުން ކުޅުދުއްފުށީ ޒޯން ސްޓޭޑިއަމްގައި ހުރި ކުޅިވަރު ކޯޓުތައް ތަރައްގީ ކުރުމަށް ހުޅުވާލި ފުރުސަތުގައި އަންދާސީ ހިސާބު ހުށައެޅުމުގެ މުއްދަތު އިތުރުކޮށްފި އެވެ.

ސްޕޯޓްސް އެރީނާ ޕްރޮޖެކްޓްގެ ދަށުން ކުޅުދުއްފުށީ ޒޯން ސްޓޭޑިއަމްގައި ހުރި 4 ކުޅިވަރު ކޯޓް ތަރައްގީކުރުމުގެ މަސައްކަތް ކޮށްދޭނެ ފަރާތެއް ހޯދުމަށް ކުރިން ކުޅުދުއްފުށީ ކައުންސިލުން އިއުލާން ކޮށްފައިވަނީ އޭޕްރިލް 16 ވީ ބުރާސްފަތި ދުވަހު 14:00 އަށް ކައުންސިލުން ވަޑައިގެން މައުލޫމާތު ސާފުކުރެއްވުމަށް ފަހު 23 އޭޕްރިލް ވާ ހޯމަދުވަހު އަންދާސީ ހިސާބު ހުށައެޅުވުމަށެވެ.

ކުޅުދުއްފުށީ ކައުންސިލް މެންބަރ އިބްރާހިމް އައްބާސް ވިދާޅުވީ އަންދާސީ ހިސާބު ހުށައެޅުމުގެ ފުރުސަތު އިތުރު ކުރީ 23 އޭޕްރިލް ގެ ކުރިން އަންދާސީ ހިސާބު ހުށައަޅާފައިވަނީ އެންމެ ފަރާތަކުން ކަމަށްވެފައި އަދި އެފަރާތުން އަންދާސީ ހިސާބު ހުށައެޅުމުގެ ކުރިން ފުރިހަމަކުރަންޖެހޭ ބައެއް މައުލޫމާތު ފުރިހަ ކުރަންޖެހޭތީ އެފުރުސަތު ދިނުމުގެ ގޮތުން ކަމަށެވެ.

އައްބާސް އިތުރަށް ވިދާޅުވީ މި ޕްރޮޖެކްޓް ނިމޭއިރު ހުންނާނީ އެއްކޯޓުން އަނެއްކޯޓަށް ނުދެވޭގޮތަށް ފެންސް ޖަހާފަ ކަމަށެވެ. އަދި ކޯޓްތަކުގެ ކައިރީގައި ހުންނަ ލައިޓްތައްވެސް ބަދަލުކުރެވޭނެ ކަމަށް އައްބާސް ވިދާޅުވި އެވެ.

ކުޅުދުއްފުއްޓަކީ ތަފާތުއެކި ކުޅިވަރު ކުޅޭ ބޮޑު އާބާދީއެއް އޮންނަ ރަށެކެވެ.