ވައިކަރަދޫގައި އެސްޓީއޯގެ ބޭސް ފިހާރައެއް ހުޅުވައިފި

ރާއްޖޭގެ މީހުން ދިރިއުޅޭ ކޮންމެ ރަށެއްގައި އާސަންދައިގެ ދަށުން ހިދުމަތް ފޯރުކޮށްދޭ އެސްޓީއޯ ފާމަސީއެއް ގާއިމް ކުރުމަށް އެސްޓީއޯއާ ދިވެހި ސަރުކާރު ގުޅިގެން ކުރިއަށް ގެންދާ މަޝްރޫއުގެ ދަށުން ހދ. ވައިކަރަދޫގައި ފާމަސީއެއް ހުޅުވާ ހިދުމަތް ދޭން ފަށައިފި އެވެ.

މިރޭ ހުޅުވުނު ފާމަސީއާއެކު ރާއްޖޭގެ އެކިކަންކޮޅުތަކުގައި ހިދުމަތް ދެމުންދާ އެ ކުންފުނީގެ ފާމަސީތަކުގެ އަދަދު 108 އަށް ވަނީ އަރާފަ އެވެ.

ހދ. އަތޮޅަކީ ރާއްޖޭގެ އަތޮޅުތަކުގެ ތެރެއިން އެންމެ އާބާދީ ބޮޑު އަތޮޅު ނަމަވެސް އެސްޓީއޯގެ ފާމަސީތައް އެންމެ މަދުން ހުރީ އެ އަތޮޅުގަ އެވެ. އެއީ ވައިކަރަދޫގެ އިތުރުން ކުޅުދުއްފުއްޓާއި ހަނިމާދޫގަ އެވެ.

އެސްޓީއޯ އިން ރާއްޖޭގެ ކޮންމެ ރަށެއްގައި ބޭސް ފިހާރައެއް ހުޅުވުމުގެ މަސައްކަތް ކުރަމުންދާއިރު، ރާއްޖެ އަށް ބޭނުންވާ ބޭހާއި މެޑިކަލް ސާމާނު ސަޕްލައި ކުރުމުގެ މަސައްކަތް ސަރުކާރުން ކުންފުންޏާ ވަނީ ހަވާލުކޮށްފަ އެވެ.