ހދ. އަތޮޅު ކައުންސިލުގެ “ތިލަދެކުނު އާރޯ” ޕްރޮގުރާމް އިފްތިތާހް ކޮށްފި

ހދ. އަތޮޅު ކައުންސިލުގެ “ތިލަދެކުނު އާރޯ” ގެ ނަމުގައި ޕްރޮގުރާމް އިފްތިތާހް ކޮށްފި އެވެ.

“ތިލަދެކުނު އާރޯ” ޕްރޮގުރާމަކީ ހދ. އަތޮޅުގެ ރައްޔިތުންނަކީ މިހާރަށް ވުރެ ތައުލީމީ އަދި ގާބިލް ބަޔަކަށް ހެދުމަށް ހދ. އަތޮޅު ކައުންސިލުން ފެށި

ޕްރޮގުރާމެކެވެ.

މި ޕްރޮގުރާމް އިފްތިތާހް ކޮށްދެއްވީ ސިވިލް ސާރވިސް ކޮމިޝަނުންގެ ރައީސް ޑރ. މުހައްމަދު ލަތީފެވެ.

މި ރަސްމިއްޔާތުގައި ވާހަކަދައްކަވަމުން އަތޮޅު ކައުންސިލްގެ ރައީސް އާދަމް ނާސިރު ވިދާޅުވީ ހދ އަތޮޅަށް ދިމާވެފައިވާ އެންމެ ބޮޑު އެއް މައްސަލައަކީ މުވައްސަސާތަކުގައި ތައުލީމީ ގާބިލް މީހުން ނެތުން ކަމަށެވެ. އިގްތިސާދީގޮތުން ފުއްދުންތެރި ބަޔަކަށްވާއިރު ތައުލިމީ ގާބިލް ބަޔަކު މިއަތޮޅުގައި ތިބެން ޖެހޭ ކަމަށް އޭނާ ވިދާޅުވި އެވެ.

މި ޕްރޮގުރާމްގެ ދަށުން އަތޮޅު ކައުންސިލާއި ސިވިލް ސާރވިސް ޓުރޭނިން އިންސްޓިޓިއުޓާ ގުޅިގެން ހދ. އަތޮޅުގައި މަސައްކަތްކުރާ ސިވިލް ސާވަންޓް އާރޯ ކުރުމަށް ކޯސްތަކެއް ހިންގުމަށް ހަމަޖެހިފައިވެ އެވެ.

އެގޮތުން ޑިޕްލޮމާއިން ޕަބްލިކް އެޑްމިނިސްޓްރޭޝަން އެންޑް މެނޭޖްމެންޓް ކޯހަކަށާއި ސެޓްފިކެޓް 3 އިން އޮފީސް މެނޭޖްމެންޓް ކޯހަށް ހޮވުނު 23 ފަރާތަކަށް ސްކޮލަރޝިޕް ހަވާލުކޮށްފަ އެވެ.ސްކޮލަރސިޕް ހަވާލުކޮށްދެއްވީ އަތޮޅު ކައުންސިލްގެ ނޮޅިވަރަން ދާއިރާގެ މެންބަރު އުސްތާޒް އަހުމަދު އިބްރާހިމެވެ.