ތައުލީމީ ދާއިރާ އާއި ސިއްހީ ދާއިރާއިން އަތޮޅު ކައުންސިލަށް ލަފާދޭ ބޯޑެއް އުފައްދައިފި

ތައުލީމީ ދާއިރާ އާއި ސިއްހީ ދާއިރާއިން ހދ. އަތޮޅު ކައުންސިލަށް ލަފާދޭ ބޯޑެއް އުފައްދައިފި އެވެ.

މި ބޯޑުގައި ހިމެނިލައްވަނީ ޖުމްލަ 12 ބޭފުޅުންނެވެ. އެއީ އަތޮޅު ކައުންސިލް ފަރާތުން 3 ބޭފުޅުންނާއި ތައުލީމީ ދާއިރާއިން 5 ބޭފުޅަކާއި ސިއްހީ ދާއިރާއިން 4 ބޭފުޅެކެވެ.

އަތޮޅު ކައުންސިލުގެ ފަރާތުން ބޯޑަށް ހަމަޖައްސާފައިވަނީ އެކައުންސިލް ރައީސް އާދަމް ނާސިރާއި ނޮޅިވަރަން ދާއިރާގެ ކައުންސިލް މެންބަރު އަހުމަދު އިބްރާހިމާއި ކުޅުދުއްފުށީ އުތުރު ދާއިރާގެ ކައުންސިލަރު އުއްމުކުލްސޫމް އިބްރާހިމެވެ.

ތައުލީމީ ދާއިރާއިން މި ބޯޑުގައި ހިމެނެނީ ޖަލާލުއްދީން ސްކޫލް ޕްރިންސިޕަލް މަހްދީ ޝާހިދާއި ގައުމީ ޔުނިވަރސިޓީގެ ކުޅުދުއްފުށީ ކެމްޕަސް މެނޭޖަރު އިބްރާހިމް މުހައްމަދާއި ހަނިމާދޫ ސްކޫލްގެ ޕްރިންސިޕަލް އަހުމަދު ޝަފީގާއި އަފީފުއްދީން ސްކޫލުގެ ޕްރިންސިޕަލް އާދަމް މުސާ އަދި ނޮޅިވަރަމް ސްކޫލުގެ ޕްރިންސިޕަލް އަދުނާން އަލީ އެވެ.

ސިއްހީ ދާއިރާއިން މި ބޯޑަށް އައްޔަންކުރެއްވި 4 ބޭފުޅުންނަކީ ހދ. ފެލެމީ އެންޑް ޗިއުރަން ސާރވިސް ސެންޓަރގެ މެނޭޖަރ ވަސީމާ މުހައްމަދާއި ކުޅުދުއްފުށީ ހޮސްޕިޓަލްގެ ޒިންމާދާރުވެރިޔާ މުހައްމަދު ހަސަން އާއި ނޭކުރަންދޫ ސިއްހީ މަރުކަޒުގެ ހުސެއިން ހަސަންގެ އިތުރުން ކުޅުދުއްފުށީ ޕަބްލިކް ހެލްތް ޔުނިޓުން ސަމީނާ މުހައްމަދެވެ.

މި ބޯޑު އުފެއްދުމުން ކައުންސިލުގެ މަސައްކަތްތައް ހަލުވިވެ ހަރުދަނާ ވެގެންދާނެ ކަމަށް އަތޮޅު ކައުންސިލްގެ ރައީސް ވިދާލުވި އެވެ. އަދި ބޯޑުގެ މަޝްވަރާގެ މަތިން ހދ. އަތޮޅަށް ދިމާވެފައިވާ ގޮންޖެހުންތައް ހައްލު ކުރަން ފަސޭހަ ވެގެންދާނެ ކަމަށް އޭނާ ވިދާޅުވި އެވެ.