އުތުރުގެ 3 އަތޮޅުގެ ކުނި މެނޭޖްކުރުމުގެ މަސައްކަތް މި އަހަރުގެ ތެރޭގައި ފެށޭނެ

ރާއްޖޭގެ އާބާދީގެ ދެބައިކުޅަ އެއްބަޔަށް ދިމާވެފައިވާ ކުނީގެ މައްސަލައަށް މި އަހަރުގެ ތެރޭގައި ހައްލެއް ލިބިގެންދާނެ ކަމަށް އެންވަޔަރަމެންޓް އެންޑް އެނާޖީ މިނިސްޓްރީގެ ނައިބު އަލީ އާމިރު ވިދާޅުވެއްޖެ އެވެ.

ހޮޓެލް ޖެންގައި ނޫސްވެރިންނަށް މައުލޫމާތު ދެއްވަމުން އެންވަޔަރަމެންޓް އެންޑް އެނާޖީގެ ނައިބު މިނިސްޓަރ އަލީ އާމިރު ވިދާޅުވީ މި އަހަރުގެ ތެރޭގައި ހއ، ހދ އަދި ށ މި ތިން އަތޮޅުގެ ރަށްތަކުގައި ކުނި މެނޭޖުކުރުމުގެ އަމަލީ މަސައްކަތް ފެށިގެންދާނެ ކަމަށެވެ.

މި މަޝްރޫއުގެ ފަންޑިން އެޖެންސީން ވަނީ ލޯނަށް އެއްބަސްވެފައި ކަމަށާއި ދިވެހި ސަރުކާރުން ވަރަށް އަވަހަށް ލޯނު އެއްބަސްވުމުގައި ސޮއި ކުރާނެކަމަށް އާމިރު ވިދާޅުވި އެވެ. އަދި ޕްރޮޖެކްޓްގެ ފީސިބިލިޓީ ސްޓަޑީ ހެދި އޭގެ އަމަލީ މަސައްކަތަށް ދެވޭވަރު ވާނެކަމަށް ވިދާޅުވިއެވެ.

މީގެއިތުރުން ނ، ރ، ބ އަދި ޅ ގެ ރަށްތަކުގެ ކުނި މެނޭޖްކުރުމުގެ މަޝްރޫއުވެސް އަވަހަށް ފެށިގެންދާނެ ކަމަށާއި މާލޭގައި ކުނި މެނޭޖްކުރުމުގެ މަސައްކަތް ސަރުކާރު ހިއްސާވާ ކުންފުންޏަކާ ހަވާލުކުރުމުގެ މަސައްކަތް ކުރަމުންދާ ކަމަށް އަލީ އާމިރު ވިދާޅުވި އެވެ.

މި މަޝްރޫއުގެ ސަބަބުން ރާއްޖޭގެ އާބާދީގެ ދެބައިކުޅަ އެއްބަޔަށް ދިމާވެފައިވާ ކުނީގެ މައްސަލައަށް ހައްލެއް ލިބިގެންދާނެ ކަމަށާއި އަދި ވިލިމާލެ ފެރީ ޓާމިނަލްގައި ތިބޭ މީހުންނަށްވާ އުނދަގުލަށް ހައްލެއް ލިބިގެންދާނެ ކަމަށްވެސް މިނިސްޓަރގެ ނައިބު ވިދާޅުވި އެވެ.