ހދ. އޭއީސީގައި ކުރިއަށްގެންދާ 3 ޕްރޮޖެކްޓަކަށް ފައިސާ ހޯދުމަށް ޖަމްބަލް ސޭލެއް ބާއްވައިފި

ހދ. އަތޮޅު ތައުލީމީ މަރުކަޒުގައި ކުރިއަށްގެންދާ 3 ޕްރޮޖެކްޓަކަށް ފައިސާ ހޯދުމުގެ ގޮތުން ޖަމްބަލް ސޭލަކާއި ކާބޯތަކެތީގެ މައުރަޒެއް ބާއްވައިފި އެވެ.

މައުރަޒު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެ ސްކޫލުގެ ޕީޓީއޭގެ ނައިބް ރައީސް ހަސަން އަލީ ވިދާޅުވީ މި މައުރަޒުތައް ބޭއްވުމުގެ މަގްސަދަކީ ސްކޫލުގައި މިހާރު ކުރިއަށް ގެންދާ 3 ޕްރޮޖެކްޓެއް ހިންގުމަށް ބޭނުންވާ ފައިސާ ހޯދުން ކަމަށެވެ. އެއީ ސްމާޓް ބޯޑު ޕްރޮޖެކްޓާއި ސްކޫލުގައި ހަދާ ވޯކްވޭ ގައި ގާއެތުރުމުގެ ޕްރޮޖެކްޓާއި އެކްޓިވިޓީ ޔުނީފޯމް ޕްރޮޖެކްޓްކަމަށް އޭނާ ވިދާޅުވި އެވެ.

ޕީޓީއޭގެ ފަރާތުން އިއްޔެ މެންދުރުފަހު ކުރިއަށް ގެންދިޔަ މި މައުރަޒުގައި ޖުމްލަ 72312.50ރ. ލިބިފައިވެ އެވެ. މި މައުރަޒުގައި ތަފާތު ވައްތަރުގެ ތައްޔާރީ ކާނާ އާއި ތަރުކާރީ އާއި މޭވާ ގެ އިތުރުން އަންނައުނު ފަދަ އެއްޗެހި ހުއްޓެވެ.

އަތޮޅު ތެރޭގެ ސްކޫލުތަކުގައި ހިންގާ ތަފާތު ހަރާކާތްތަކަށް ބޭނުންވާ ފައިސާ ހޯދުމަށް ކޮންމެ އަހަރަކު ބެލެނިވެރިން ބޮޑު ހޭދައެއް ކުރަން ޖެހެ އެވެ.