ބިދޭސީންގެ މައްސަލަ އަންނަ މޭ މަހަށް ހައްލުވާނެ: އިހުސާން

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަތައް އަންނަ އަހަރުގެ މެއި މަހާ ހަމައަށް ހައްލު ކުރުމަށް އަމާޒު ހިފާފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ރޭ ކުރިޔަށް ގެންދިޔަ "އަހާ" ފޯރަމްގައި މީހަކު ކުރި ސުވާލަކަށް ޖަވާބު ދެއްވަމުން އިހުސާން ވިދާޅުވި ގޮތުގައި ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމުގެ މަސައްކަތް ކުރަނީ ތިން ބަޔަކަށް ބަހާލައިގެންނެވެ.

ފުރަތަމަ ބަޔަކީ ބިދޭސީންނަކީ ކޮން ބައެއްތޯ ބަލައި އެ މީހުންގެ ބަޔޯ މެޓްރިކްސް މައުލޫމާތުތައް ނެގުމެވެ. އެ މަސައްކަތުގެ 95 ޕަސެންޓު ނިންމާލެވިއްޖެ ކަމަށާއި އަނެއް ހަތަރު ޕަސެންޓު މީހުން މިވަގުތު ރާއްޖޭގައި ނެތް އިރު ބަޔޯ މެޓްރިކްސް ނުނެގެނީ އެއް ޕަސެންޓު މީހުންގެ ކަމަށް އިހުސާން ވިދާޅުވި އެވެ.

"މުޅި ދުނިޔޭގައި ވެސް މިވަގުތަށް ބަލާއިރު ސިންގަޕޫރާއި ރާއްޖެ އަދި ޔޫއޭއީ ތިން ގައުމު މި އޮތީ އެއް ޕަސެންޓް ތްރެޝްހޯލްޑުގައި ބިދޭސީން ބަޔޮމެޓްރިކަލީ އައިޑެންޓިފައި ކުރޭ." އިހުސާން ވިދާޅުވި އެވެ.

ދެވަނަ މަސައްކަތަކީ އިހުސާން ވިދާޅުވި ގޮތުގައި ވިސާ ފީ ނުދެއްކުން ފަދަ ގަވާއިދާ ހިލާފަށް އުޅޭ ބިދޭސީންގެ މައްސަލަ އެވެ. އެ މީހުންތައް ހޯދައި ފޮނުވާލުމަށް ރާއްޖޭގެ ބޮޑެތި އާބާދީތަކާއި އެކި ރަށްރަށުގައި އޮޕަރޭޝަންތައް ކުރިޔަށް ގެންދާނެ ކަމަށް އިހުސާން ވިދާޅުވި އެވެ.

މީގެ އިތުރުން ރާއްޖެ އަށް ބިދޭސީން ގެނައުމަށް ފަހު އެ މީހުންނާ މެދު އިހުމާލުވުމާއި ބިދޭސީން ޓްރެފިކް ކުރުމުގައި އުޅެ ދިވެހިންނާ މެދު ފިޔަވަޅު އެޅުމާއި ޖިނާއީ މައްސަލައެއްގެ ގޮތުގައި އެކަންކަން ބަލާނެ ކަމަށް ވެސް މިނިސްޓަރު ވިދާޅުވި އެވެ.

"އެ ހުރިހާ ކަމަކާއެކީ އަންނަ އަހަރު މެއި މަހާ ހަމައަށް ހައްލު ކުރުން އަމާޒަކީ." އިހުސާން ވިދާޅުވި އެވެ.

އިހުސާން ވިދާޅުވީ ރާއްޖޭގައި ހުރި ދަނޑުބިންތަކުގެ ކޮންޓްރޯލް މިހާރު އޮތީ ބިދޭސީންގެ އަތުގަ އެވެ. އޭގެ އިތުރުން މާރުކޭޓު ގޮޅިތަކާއި ދޯނިތަކާއި ކަންމަތީ ފިހާރަތައް ހިންގަނީ ވެސް އެ މީހުން ކަމަށާއި އެ މައްސަލަތައް ހައްލުވުމުން ހުރިހާ ކަމެއް ދިވެހިންގެ ވިޔަފާރި އަށް ބަދަލުވާނެ ކަމަށް އިހުސާން ވިދާޅުވި އެވެ.