ދިރާގުން ކުޑަކުދިންގެ ހިޔާއަށް ދެމުން އަންނަ ސްޕޮންސަޝިޕް އާކޮށްފި

ދިރާގުން ކުޑަކުދިންގެ ހިޔާއަށް ދެމުން އަންނަ ޓީޗަރުން ތަމްރީންކުރުމުގެ ސްޕޮންސަޝިޕް މި އަހަރު ވެސް އާކޮށްފި އެވެ.

ކުޑަކުދިންގެ ދުވަހާ ގުޅުވައިގެން އިއްޔެ ދިރާގު ހެޑް އޮފީހުގައި ބޭއްވި ހަފްލާގައި ދިރާގުގެ ޗީފް އެގްޒެކެޓިވް އިސްމާއިލް ރަޝީދު ވިދާޅުވީ މި އަހަރު ވެސް ދިރާގުން ކުޑަކުދިންގެ ހިޔާގައި މަސައްކަތް ކުރާ ޓީޗަރުން ތަމްރީން ކުރަން ސްޕޮންސާ ކޮށްދޭނެ ކަމަށެވެ.

2008 ފެށިގެން ދިރާގުން ދަނީ ކުޑަކުދިންގެ ހިޔަލަށް ގިނަގުނަ އެހީތެރިކަމެއް ފޯރުކޮށްދެމުންނެވެ. އޭގެ ތެރެއިން ޓިޗަރުންގެ ތަމްރީނު ކުރުމުގެ ޕްރޮގްރާމް ސްޕޮންސަރ ކުރުމުގެ އިތުރުން ޕޭރެންޓް ކޮންޓުރޯލް ސަރވިސްއާއެކު ހިލޭ އިންޓަރނެޓްގެ ހިދުމަތް އަންނަނީ ފޯރުކޮށްދެމުންނެވެ. އަދި 2013 ވަނަ އަހަރުވަނީ ލައިބްރަރީއަކާއި ދެ ކޮންޕިއުޓަރ ލެބް ހުޅުވައި ދީފަ އެވެ.

ދިރާގުން ވަނީ ކުޑަކުދިން ގެ ހިޔަލުގައި މުނިފޫހިފިލުވަން ކޮންމެ އަހަރަކުވެސް ތަފާތު ހަރަކާތްތައް ވެސް ކުރިޔަށް ގެންގޮސްފަ އެވެ. އޭގެ ތެރެއިން އެކި ކަހަލަ ޖާދުލުގެ ހުނަރު ދައްކުވައި ދޭ މެޖިކް ޝޯތަށް ވެސް ހިމެނެ އެވެ.