ވިޔަފާރިތަކުން އުފައްދާ ތަކެތި ބަންދުކުރުމުގެ ހިދުމަތް ކުޅުދުއްފުށީގައި ފަށަނީ

ކުދި އަދި މެންދުފަތީގެ ވިޔަފާރިތަކުން އުއްފަދާ ތަކެތި ރަގަޅު ފެންވަރަކަށް ބަންދުކުރުން ނުވަތަ ޕެކޭޖިންގ ފެސިލިޓީސްގެ ހިދުމަތް ކުޅުދުއްފުށިގައި ގާއިމްކުރުމުގެ މަސައްކަތް ކުރަމުންދާ ކަމަށް ހދ. ބިޒިނަސް ޑިވެލޮޕްމެންޓް ސެންޓަރުގެ(ބީޑީއެސްސީ) މެނޭޖަރުގެ އިބްރާހިމް އިމާދު ވިދާޅުވެއްޖެ އެވެ.

ބީޑީއެސްސީގެ ސެންޓަރު ކުޅުދުއްފުށީގައި ރަސްމީކޮށް ހުޅުވުމަށް ބުރާސްފަތި ދުވަހު ބޭއްވި ރަސްމިއްޔާތުގައި ވާހަކަދައްކަވަމުން އިމާދު ވިދާޅުވީ ޕެކޭޖިން ފެސިލިޓީ ގާއިމްކުރުމަށް ބޭނުންވާ ތަކެތި މިހާރު މިނިސްޓްރީ ފޯރުކޮށްދީފައިވާ ކަމަށާއި އަދި އެކަމަށް މިހާރު އިމާރާތެއް ވެސް ހަމަޖެހިފައިވާ ކަމަށް އޭނާ ވިދާޅުވި އެވެ. އެމަސައްކަތް އަވަސް މުސްތަގުބަލެއްގައި ފެށިގެންދާނެ ކަމަށް އިމާދު ވިދާޅުވި އެވެ.

ދުނިޔެ ގަބޫލުކުރާ ފެންވަރަށް ގާއިމްކުރާ މި ޕެކޭޖިންގ ފެސިލިޓީޒްގައި ތަކެތި ބަންދުކުރުމަށް ހަމަޖެހިފައިވަނީ ޕެޓް ފުޅި އާއި ބިއްލޫރި ފުޅި އަދި ކޮތަޅުގަ އެވެ. މި ޕެކޭޖިންގ ފެސިލިޓީސް އަކީ ހއ.ހދ އަދި ށ އަތޮޅުގެ ވިޔަފާރިތަކަށް ހާއްސަކޮށް ގާއިމްކުރާ ތަނެކެވެ.