ހަނިމާދޫ ކައުންސިލުގެ ރައީސްކަމަށް އާދަމް އިބްރާހިމް އިންތިހާބުކޮށްފި

ހުސްވެފައިވާ ހަނިމާދޫ ކައުންސިލްގެ ރައީސްގެ މަގާމަށް އާދަމް އިބްރާޙީމް އިންތިހާބުކޮށްފި އެވެ.

އޭނާ އެމަގާމަށް އިންތިހާބުކުރީ އެކައުންސިލްގެ ރައީސްކަމުގެ މަގާމުގައި ހުުންނެވި ޕީޕީއެމް މެމްބަރު މުހައްމަދު ރާޒީގެ އިތުބާރުނެތް ކަމަށް ބުނެ މަގާމު މިދިޔަ އޭޕްރީލްމަހު ވަނީ ދުރުކޮށްފަ އެވެ.

އާދަމް އިބްރާހިމަކީ ހަނިމާދޫ ކައުންސިލްގެ ނައިބް ރައީސްގެ މަގާމުގައި ހުންނެވި ބޭފުޅެކެވެ.އޭނާ ރައީސްގެ މަގާމަށް އިންތިހާބުކުރީ މި މެއި މަހުގެ 14 ވަނަ ދުވަހު ބޭއްވީ އެކައުންސިލްގެ އާއްމު ބައްދަލުވުމުގަ އެވެ. އާދަމް އިބްރާހީމް ރައީސްކަމަށް އިންތިހާބުވީ 3 ވޯޓް ލިބިގެންނެވެ. އާދަމް ރައީސްކަމަށް ހޮވަން ނުފެންނަކަމަށް 2 ވޯޓް ލާފައިވެ އެވެ. މި ވޯޓްގައި އެކައުންސިލްގެ 5 މެމްބަރުންވެސް ބައިވެރިވެފައިވެ އެވެ.

އެކައުންސިލްގެ ރައީސްކަމުގައި ކުރިން ހުންނެވި ރާޒީގެ އިތުބާރުނެތްކަމަށް 2014 ވަނަ އަހަރުގެ އޮގަސްޓް މަހުގެ 20 ވަނަ ދުވަހު އޮތް އެކައުންސިލްގެ އާއްމު ޖަލްސާގައި ފާސްކޮށްފައިވާތީ އެކައުންސިލްއަށް ރައީސަކު އިންތިޚާބުކުރުމަށް 27 އޮގަސްޓް 2014 ގައި ބޭއްވި އިންތިހާބުވެސް އާދަމް އިބްރާޙީމް ކާމިޔާބުކުރެއްވި އެވެ.

ނަމަވެސް ރާޒީގެ އިތުބާރު ނެތްކަމަށް ފާސްކުރީ ގަވައިދާ ހިލާފަށްކަމަށް ބުނެ އެލްޖީއޭއިންވަނީ އެ ނިންމުން ބާތިލްކޮށްފަ އެވެ. އޭގެފަހުން މިއަހަރު އޭޕްރީލް މަހުގެ 15 ވަނަ ދުވަހު ބޭއްވުނު އެކައުންސިލްގެ އާންމު ބައްދަލުވުމުގައި ރާޒީގެ އިތުބާރު ނެތްކަމަށްވަނީ 2 ވަނަ ފަހަރަށްވެސް ފާސްކޮށްފަ އެވެ. 4 މެމްބަރުން ބައިވެރިވި އެ ބައްދަލުވުމުގައި ރާޒީގެ އިތުބާރު ނެތްކަމަށް 3 މެމްބަރުން ވޯޓް ދީފައިވެ އެވެ. އެ ބައްދަލުވުމުގައި ބައިވެރި ނުވަނީ ޕީޕީއެމްގެ މެމްބަރު ހަސަން ޖައުފަރެވެ.