ތިމާވެށީގެ ފޮޓޯ މުބާރާތުން ދެވަނަ މިހާޒަށް ލިބިއްޖެ

ތިމާވެށީގެ ދުވަސް ފާހަގަ ކުރުމުގެ ގޮތުން މިނިސްޓްރީ އޮފް އެންވަޔަރަމެންޓް އެންޑް އެނާރޖީން ބޭއްވި މިއަހަރުގެ ތިމާވެށީގެ ފޮޓޯ މުބާރާތުން ދެވަނަ ކުޅުދުއްފުށީ ނީލްވިލާ މުހައްމަދު މިހާޒަށް ލިބިއްޖެ އެވެ.

“ދެމެހެއްޓެނިވި ތަރައްޤީއަކަށް ދިރޭތަކެތީގެ ނަސްލު” މިތީމުގެ ދަށުން މިހާޒު ފޮޓޯ ހުށަހަޅާފައިވަނީ ތިމާވެއްޓަށް ކުރަމުންދާ އަސަރު އަދި ތިމާވެށްޓާއި އިންސާނާ މި ދެކެޓަގަރީން ނެވެ. އަދި މި ދެ ކެޓަގަރީން ވެސް މިހާޒް ވަނީ 2 ވަނަ ހާސިލް ކޮށްފަ އެވެ.

މިދިޔަ އަހަރު، އެންވަޔަރމަންޓް މިނިސްޓްރީއާއި މޯލްޑިވްސް ފޮޓޯގްރާފާރސް އެސޯސިއޭޝަން ގުޅިގެން ބަޔޯޑައިވަސިޓީ ދުވަހާއި ތިމާވެށީގެ ދުވަސް ފާހަގަ ކުރުމުގެ ގޮތުންބޭއްވި ފޮޓޯގްރަފީ މުބާރާތުގެ ”ރާއްޖޭގެ ހާއްސަ ވެށިތައް” ކެޓަގަރީއިންވެސް މިހާޒް ވަނީ 3 ވަނަ ހޯދާފައެވެ.

މި އަހަރުގެ ތިމާވެށީގެ ދުވަހާއި ދިމާކޮށް އެންވަޔަރަމެންޓް މިނިސްޓްރީން މި ބޭއްވި މި މުބާރާތަކީ ރައްޔިތުންގެ މެދުގައި ތިމާވެށީގެ ހޭލުންތެރިކަން އިތުރުކޮށް، ތިމާވެށްޓާމެދު ފަރުދުންގެ ޝުޢޫރުތައް ފޮޓޯގެ ޒަރީއާއިން ފާޅުކުރުމުގެ ފުރުސަތު ހޯދައިދިނުމުގެ މަޤުޞަދުގައި ބޭއްވުނު މުބާރާތެކެވެ.