ހދ. އަތޮޅު ކައުންސިލްގެ ރައީސް ޕީޕީއެމްއަށް ސޮއިކޮށްފި

ހދ އަތޮޅު ކައުންސިލްގެ ރައީސް އާދަމް ނާސިރު ޕީޕީއެމްއަށް މިއަދު ސޮއިކޮށްފި އެވެ.

އާދަމް ނާސިރު ޕީޕީއެމްއަށް ސޮއި ކޮށްފައިވަނީ މިއަދު މުލިއާގޭގައި ކުރިއަށް ގެންދިޔަ ހާއްސަ ރަސްމިއްޔާތެއްގައެވެ. އޭނާ ކައުންސިލަށް ހޮވިފައިވަނީ އަދާލަތް ޕާޓީގެ މެމްބަރެއްގެ ގޮތުގަ އެވެ.

މީގެ އިތުރުން ހއ. ތުރާކުނު ކައުންސިލްގެ ރައީސް އަލީ އަބުދުއްލަތީފާއި އެކައުންސިލްގެ ނައިބު ރައީސް ތޯހާ އަލީއާއި އަދި ހއ. ހޯރަފުށި ކައުންސިލް މެމްބަރު މުހައްމަދު ސަލީމް އަދި އެރަށު ކައުންސިލްގެ ޒިންމާދާރު ވެރިޔާ މުހައްމަދު ވަހީދު އުސްމާންވެސް ވަނީ މިއަދު ޕީޕީއެމް އާއި ގުޅިފައެވެ.

މި 4 ކައުންސިލަރުންގެ އިތުރުން ބ. ހިތާދޫ ކައުންސިލްގެ ރައީސް އަބުދުﷲ ރަޝީދު އަބުދުލް ޣަފޫރުވެސް ވަނީ މިއަދު ޕީޕީއެމްއަށް ސޮއިކޮށްފަ އެެވެ.

މީިޑިއާއަށް މައުލޫމާތުދެމުން އެބޭފުޅުން ވިދާޅުވީ އެބޭފުޅުން ޕީޕީއެމާ ގުޅިވަޑައިގަތީ އެޕާޓީއާއި ގުޅިގެން ނޫނީ ރައްޔިތުންނަށް ހިދުމަތްދީ ގައުމު ތަރައްގީ ކުރަން އުނދަގުވާނެތީ ކަމަށެވެ.

މި ރަސްމިއްޔާތުގައު ސަރުކާރުން ރާއްޖެއަށް ކޮށްދެއްވަމުން އަންނަ ކަންތައްތައް ވަނީ އެބޭފުޅުން ފާހަގަ ކުރައްވާފަ އެވެ.