މާބަނޑު މީހުން ބޭތިއްބުމަށް ކުޅުދުއްފުށީގައި އިމާރާތް ކުރި “އުފަން ހިޔާ” ހުޅުވައިފި

މާބަނޑު މީހުން ބޭތިއްބުމަށް ހާއްސަކޮށް ކުޅުދުއްފުށީގައި ކަރިޓަސް އިޓާލިއާނާގެ ހިލޭ އެހީިގެ ދަށުން އިމާރާތް ކުރި “އުފަން ހިޔާ” ހުޅުވައިފި އެވެ.

އުފަން ހިޔާ ހުޅުވައިދެއްވީ އެ އިމާރާތުގައި މިއަދު ކުރިއަށް ދިޔަ ހާއްސަ ރަސްމިއްޔާތެއްގައި ހެލްތް މިނިސްޓަރ އިރުތިޝާމް އާދަމް އެވެ.

އިމާރާތް ހުޅުވައި ދެއްވުމަށް ފަހު އިރުތިޝާމް ދެއްކެވި ވާހަކަފުޅުގައި ވިދާޅުވެފައިވަނީ ކުޅުދުއްފުށީގައި ބިނާ ކުރެވިގެން މިދިޔަ މެޓާރނިޓީ ވެއިޓިން ހޯމްގެ ސަބަބުން ކުޅުދުއްފުއްޓަށް ހިދުމަތް ހޯދުމަށް އަންނަ އެހެން ރަށްރަށުގެ މާބަނޑު މީހުންނަށް ލުއިފަސޭހަތަކެއް ލިބިގެން ދާނެ ކަމަށެވެ.

އެގޮތުން ހިދުމަތް ހޯދުމަށް އަންނަ މާބަނޑު މީހުންނަށާއި ވިހެއުމަށް ފަހު އިތުރު ފަރުވާއަށް މަޑުކުރަން ޖެހޭ މާބަނޑު މީހުންނަށް ހުޅުވިގެންމިދިޔަ މެޓާރނިޓީ ވެއިޓިންގެ ސަބަބުން އިތުރު ފަސޭހަތަކެއް ލިބިގެން ދާނެ ކަމަށް މިނިސްޓަރ ވިދާޅުވި އެވެ.

އޭގެ އިތުރުން 14 ސްޕެޝިލިސްޓުންނާއި 10 މެޑިކަލް އޮފިޝަލުނާ އެކު ހިދުމަތް ދެމުން އަންނަ ކުޅުދުއްފުށީ ރީޖަނަލް ހޮސްޕިޓަލުގައި ފޯރުކޮށްދެމުން އަންނަ ހިދުމަތްތަކަކީ ފާހަގަކޮށްލެވޭ ފަދަ ހިދުމަތްތަކެއް ކަމަށާއި ކުރިއަށް އޮތް ތަނުގައިވެސް ސަރުކާރުގެ އަމާޒަކީ ސިއްހީ ދާއިރާއަށް އިތުރު ކުރިއެރުންތަކެއް ހޯދައި ދިނުން ކަމަށް މިނިސްޓަރ ވިދާޅުވި އެވެ.

ހޯލް އަކާއި، ލޯންޑްރީ ރޫމެއް އަދި ލެކްޗަރާ ރޫމެއްގެ އިތުރުން ޑައިނިން ރޫމްއެއް ހިމަނައިގެން އިމާރާތް ކުރި މި އުފަން ހިޔާގައި މާބަނޑު އަންހެނުން ތިބެވޭނެހެން 13 ކޮޓަރި ވަނީ ހިމަނާފަ އެވެ.

2011 ވަނަ އަހަރު ބިންގާ އެޅި މި އިމާރާތަކީ 9.1 މިލިއަން ރުފިޔާ ހަރަދުކޮށްގެން ހެދި އިމާރާތެކެވެ.