ކުޅުދުއްފުށި އޮންލައިން ކުރުވާހަކަ ލިޔުމުގެ މުބާރާތާއެކު ދީނީ ޅެން ހެދުމުގެ މުބާރާތެއް ބާއްވަނީ

ކޮންމެ އަހަރަކުވެސް ކުޅުދުއްފުށި އޮންލައިން އިން ސްކޫލުތަކުގެ ދަރިވަރުންނަށް އަމާޒު ކޮށްގެން ބާއްވަމުން އަންނަ، ކުރުވާހަކަ ލިޔުމުގެ މުބާރާތް މިއަހަރުވެސް އޮންނާނެ އެވެ. ނަމަވެސް މިމުބާރާތުގައި ބައިވެރިވެވޭ ގޮތް މިއަހަރު ތަފާތު ވާނެ އެވެ.

މިގޮތުން ކުޅުދުއްފުށި އޮންލައިން ކުރުވާހަކަ ލިޔުމުގެ މުބާރާތުގައި މިއަހަރު ވާހަކަ ލިޔުމަށް ހުޅުވާލާފައި ވަނީ ޖަލާލުއްދީން ސްކޫލުގެ ގްރޭޑް 11 އަދި 12 ގެ ދަރިވަރުންނަށެވެ.

މިއަހަރު އަލަށް ފެށުމަށް ހަމަޖެހިފައިވާ ދީނީ ޅެން ހެދުމުގެ މުބާރާތް ބޭއްވުމަށް ހަމަޖެހިފައިވަނީ ޖަލާލުއްދީން ސްކޫލާއި އަފީފުއްދީން ސްކޫލުގެ ގްރޭޑް 8،9 އަދި 10 ގެ ކުދިންނަށް ހުޅުވާލައިގެންނެވެ.

މިދެމުބާރާތުގައި ބައިވެރިވުމުގެ ފުރުސަތު މިހާރު ވަނީ ހުޅުވާލައިފައެވެ. މިގޮތުން މުބާރާތްތަކުގައި ބައިވެރިވާން ބޭނުންވާ ދަރިވަރުން ސްކޫލުގެ ދިވެހި ޑިޕާޓްމަންޓް މެދުވެރިކޮށް ނަންނޯޓް ކުރެވޭނެ އެވެ. ވާހަކަ ލިޔުމާއި ޅެން ހެދުން އޮންނާނީ ޖޫން 27 ވާ ހޮނިހިރު ދުވަހު ޖަލާލުއްދީން ސްކޫލުގެ ހޯލުގައެވެ.

ކުޅުދުއްފުށި އޮންލައިންގެ ކުރުވާހަކަ ލިޔުމުގެ މުބާރާތަކީ ވަނަ ވަނަ އަށް އަންނަ ދަރިވަރުންނަށް ޓްރޮފީއާއެކު ޓެބްލެޓާއި އިންޓަނެޓް މޮޑެމް ފަދަ އިނާމުތައް ދެވޭ މުބާރާތެކެވެ. މިގޮތުން މިއަހަރު ބާއްވާ މުބާރާތުގެ ވަނަވަނަ ހޯދާ ދަރިވަރުންނަށް ވެސް އަގުހުރި އިނާމުތައް ވަނީ ކަނޑައެޅިފައެވެ.