ފުނަ ޝޯގައި ހާލުފޮޅި ފިހުމާއި ވަންޖެހުން ދައްކާލަނީ

މިނިވަން 50 ފާހަގަކުރުމުގެ ގޮތުން ކުރިއަށްގެންދާ ފުނަ ޝޯގައި ކުޅުދުއްފުށީގެ ފަރާތުން ހާލުފޮޅި ފިހުމާއި ވަންޖެހުން ދައްކާލަން ހަމަޖެހިއްޖެ އެވެ.

ވަރަށް ކުރިންސުރެ ހާލުފޮޅިއަކީ ކުޅުދުއްފުއްޓަށް ހާއްސަ އެއްޗެކެވެ. ކުރިން ހާލުފޮޅިއަށް ކުޅުދުއްފުށީގައި ކިޔަމުން އައީ ތުނިފޮޅި އެވެ. ހާލުފޮޅި ނަމަށް ބަދަލުވެގެންދިޔައީ އެ ފިހުމަށްޓަކައި ކުރަންޖެހޭ މަސައްކަތްތައް އުނދަގޫކަމުން އެއަށް ބައެއް އެހެން ރަށްރަށު މީހުން “ހާލުފޮޅި” ނަން ދިނުމުންނެވެ.

ވަންޖެހުމަކީ ތަފާތު އެކި މުނާސަބާތަކުގައި ކުޅުދުއްފުށީގައި ކުޅެމުންދިޔަ ކުޅިވަރެކެވެ. ނަމަވެސް ގާތްގަނޑަކަށް އުވިފައޮތް މިކުޅިވަރު ކުޅުދުއްފުށީގައި ބާއްވާ ފުނަ ޝޯއިން ފެނިގެންދާނެ އެވެ.

“ކުޅުދުއްފުށި އޮންލައިނަށް” މައުލޫމާތު ދެއްވަމުން ކުޅުދުއްފުށި ކައުންސިލްގެ ޒިންމާދާރު ވެރިޔާ އިސްމާއިލް އިބްރާހިމް ވިދާޅުވީ ކުޅުދުއްފުށީގެ ފަރާތުން ދަފިނެގުން، ކުރުފަލި، ކޯޑި ނެގުން، ބަންދު ދުއްވުން، ވަންޖެހުން ފަދަ ކުޅިވަރުތައް ފެނިގެންދާނެ ކަމަށެވެ.

އޭގެ އިތުރުން މަސައްކަތުގެ ބައިން ރޯނުވެށުން، ތިލޭރުކަން އަދި ހާލުފޮޅި ފިހުން ފެނިގެންދާނެ ކަމަށްވެސް އިސްމާއިލް ވިދާޅުވި އެވެ.

ހދ.އަތޮޅުން ކުޅުދުއްފުށީގައި ބޭއްވުމަށް ހަމަޖެހިފައި އޮތް މި ޝޯގައި ކުޅުދުއްފުށީގެ ފަރާތުން 13 އައިޓަމެއް ހުށަހެޅުމަށް ވަނީ ހަމަޖެހިފަ އެވެ. މި ޝޯގައި އަތޮޅުގެ 6 ރަށެއްގެ 20 ގްރޫޕުން އައިޓަމްތައް ހުށަހެޅުމަށް ހަމަޖެހިފައި އެވެ.

ކުރިން ޖޫން 13 ގައި ބެއްވުމަށް ހަމަޖެހުނު ފުނަ ޝޯ މިހާރު ވަނީ ރޯދަމަހުގެ ފަހުން ބާއްވާގޮތަށް ހަމަޖައްސާފަ އެވެ.