ރިސޯޓް ހަދަން ދޫކޮށްފައިވާ ރަށްތައް ސަރުކާރަށް ނަގައި އެރަށްތައް ހެދޭވަރުގެ ބަޔަކާ ހަވާލުކުރުމަށް މެމްބަރު ނާޒިމް ގޮވާލައިފި

ހދ. އަތޮޅުގައި ރިސޯޓް ހަދަން ދޫކޮށްފައިވާ ރަށްތައް ސަރުކާރަށް ނަގައި އެރަށްތައް ހެދޭނެ ބަޔަކާ ހަވާލުކުރުމަށް ވައިކަރަދޫ ދާއިރާގެ މެމްބަރު މުހައްމަދު ނާޒިމް ސަރުކާރަށް ގޮވާލައިފި އެވެ.

މެމްބަރު ނާޒިމް މިހެއް ގޮވާލެއްވިއިރު ހދ. އަތޮޅުގައި ރިސޯޓް ހަދަން ދޫކޮށްފައިވާ އެއްވެސް ރަށެއް މިހާތަނަށް ހުޅުވިފައެއް ނެތެވެ. ބައެއް ރަށްތައް ދޫކުރި ފަހުން 10 އަހަރުވެސް ވަނީ ވެފަ އެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހެއް ގެނައުމުގެ އިބްތިދާއީ ބަހުސްގައި ވާހަކަދައްކަވަމުން ވައިކަރަދޫ ދާއިރާގެ މެމްބަރު މުހައްމަދު ނާޒިމް ވިދާޅުވީ ކައުންސިލްތަކަށް ބާރު ލިބިފައިވާ ނަމަ މިހާރު ހދ. އަތޮޅުގައި ފަތުރުވެރިކަން އޮތީކަމަށެވެ. ހދ. އަތޮޅުގައި ރިސޯޓް ހަދަން ދޫކޮސްފައިވާ އެއްވެސް ރަށެއް މިހާތަނަށް ހުޅުވިފައި ނުވާކަން ފާހަގަކުރައްވަމުން ނާޒިމް ވިދާޅުވީ ބައެއް ރަށްތައް ފަތުރުވެރިކަން ތަރައްގީކުރުމަށް ދޫކޮށްފައިވާތާ 16 އަހަރުވެފައިވާއިރު އެކަންތައް ނުވެ އޮތީ ކައުންސިލްތަކުގައި ބާރުނެތުމުން ކަމަށެވެ.

“އަޅުނޑުމެން މިއަދު ސަރުކާރަށް ވެސް ގޮވާލަން. އަޅުގަނޑު އެދެން ވެސް އެދެނީ ކޮންމެ ބޭފުޅެއްގެ ރަށެއް ކަމުގައި ވިޔަސް އެ ރަށްރަށް ނަގައި އެ ކަން ކުރެވޭނެ ބަޔަކަށް އެ ރަށްރަށް ހަވާލުކުރުމަށް. ކައުންސިލުތަކަށް ވެސް އަޅުގަނޑު އެދެން، މިވަގުތުން މިވަގުތަށް ވެސް ތި ބޭފުޅުން ޕެޓިޝަނެއް ހަދައިގެން ނަމަވެސް އެ ރަށްރަށް ހަވާލުވެފައި ތިބި ހދ.އަތޮޅުގެ ޓޫރިޒަމަށް ދޫކުރެވިފައި ހުރި ރަށްރަށް ހަވާލުކޮށްފައި ހުރި ބޭފުޅުންގެ އަތުން ނަގައި ސަރުކާރުން އެ ކަންކަން ވާން އޮތް ބަޔަކާ ހަވާލުކޮށް އަޅުގަ ނޑުމެންނަށް އެ ކަންކަން ފަހިކޮށްދިނުން” މެމްބަރު ނާޒިމް ވިދާޅުވި އެވެ.

ނާޒިމް ވިދާޅުވީ ކުޅުދުއްފުށީގައި އިމާރާތްކޮށްފައިވާ ފުލެޓްތަކަށް މީހުންވަނުމާ އެކު ކުޅުދުއްފުށީ ސިޓީ ކައުންސިލަކަށް ބަދަލުވެގެންދާނެ ކަމަށެވެ. މިހާރު ސިޓީ ކައުންސިލަކަށް ވުމަށް ހދ އަތޮޅުން މަދުވަނީ 300 އެއްހާ މީހުންކަމަށް އޭނާ ވިދާޅުވި އެވެ. އަދި ސިޓީ ކައުންސިލަަކަށް ކުޅުދުއްފުށި ބަދަލުވުން ގާތުގައި އޮތްވާ ސަރުކާރުން މަސައްކަތް ކުރަނީ ސިޓީ ކައުންސިލްތަކުގެ ބާރުތައް ސަރުކާރުގެ މުށުތެރެއަށް ގެންނަ އުޅޭ މަންޒަރުކަމަށެވެ. ރައްޔިތުންނާ ގާތުން ވީހާވެސް ފުޅާ ދާއިރާއެއްގައި މަސައްކަތްކުރުމުގެ ފުރުސަތު ކައުންސިލްތައް ދިނުމަށް އޭނާ އެދިލެއްވި އެެވެ.

“އަތޮޅުގެ ހދ.އަތޮޅު ކުޅުދުއްފުށީ ސިޓީ ކައުންސިލަކަށް ބަދަލުވެގެންދާނީ. މިހާރު ސިޓީ ކައުންސިލަ ކަށް ބަދަލުވުމަށް އެ އަތޮޅަށް މަދުވާ އަދަދަކީ ތިން ސަތޭކައެއްހާ މީހުން. އަޅުގަނޑު ޤަބޫލުކުރާ ގޮތުގައި އަޅުގަ ނޑުމެންގެ ރައީސް، ރައީސް ނަޝީދު އަޅުއްވާފައިވާ ފްލެޓްތަކަށް ، ކުޅުދުއްފުށީގައި އަޅުއްވާފައިވާ ފްލެޓުތަކަށް މީހުން ވަނުމާ އެކު މި އަދަދު ހަމަވެގެންދާނެ. އިރާދަކުރެއްވިއްޔާ އެދުވަހަކީ އަޅުގަ ނޑުމެންނަށް ކުޅުދުއްފުށީގައި ސިޓީ ކައުންސިލެއް އުފެދިގެންދާނެ ދުވަސް. މިއީ ދާދި ކައިރީގައި އޮތް ދުވަހެއް. އަޅުގަނޑުމެންނަށް ހިތާމައަކީ މި ދުވަސް މިހާ ކައިރީގައި އޮއްވާ ހުރިހާ ބާރުތަކެއް ނަގާ ސަރުކާރުން އަތް މަތިކޮށް އަޅުގަ ނޑުމެންނަށް ލިބެންވާ ބާރުތައް މި ބޭފުޅުން އަތް ދަށުގައި ބާއްވައި އަޅުގަނޑުމެންނަށް ލިބެންވާ ޚިދުމަތްތަކަށް ހުރަސްއަޅަމުން ދިއުން. މިއީ އަޅުގަ ނޑުމެން ހިތާމަކުރާ ކަމެއް. އަޅުގަ ނޑު އެދެނީ މިގޮތަށް ހުރި އިޞްލާޙުތައް އަލުން އަނބުރާ ގެންގޮސް އަޅުގަ ނޑުމެންނަށް ވީހާ ފުޅާ ދާއިރާއެއްގައި ރައްޔިތުންނަށް ޚިދުމަތް ދިނުމަށް ޓަކައި ކައުންސިލުތަކަށް ބާރު ދިނުން” ނާޒިމް ވިދާޅުވި އެވެ.