އެއްގަމު މަސް ގެނެސްފައިވަނީ ރައްކާތެރިގޮތުގައި ތޯ ބެލުމަށް ހެލްތް އޮފިޝަލުން ފާޅު ބޯޓް އަރައިފި

ފިނި ކުރި އެއްގަމު މަހުގެ ބާވަތްތައް ކުޅުދުއްފުއްޓަށް ގެންނަނީ ރައްކާތެރިގޮތުގައި ތޯ ބެލުމަށް ކުޅުދުއްފުށީ ޕަބުލިކް ހެލްތުން ފަށާފައިވާ އިންސްޕެކްޝަނުގެ ތެރެއިން މިއަދު ފާޅު ބޯޓަށް އަރައި، ފާސްކޮށްފި އެވެ.

އެެހެންނަމަވެސް މިއަދު 3 ޖަހާއިރު މާލެއިން ކުޅުދުއްފުއްޓަށް އައި ފާޅު ބޯޓުން އެއްވެސް ވަރަކަށް ފިނި ކުރި އެއްގަމު މަހުގެ ބާވަތްތައް މި ދަތުރު ގެނެސްފައެއް ނުވެ އެވެ .

މިއަދު ކުރިއަށް ގެންދިޔަ މި އިންސްޕެކްޝަނުގައި 6 ހެލްތް އޮފިޝަލުންނާއި ކުޅުދުއްފުށީ ކައުންސިލް މެމްބަރު އައިމިނަތު މަޖީދާ ވަނީ ފާޅު ބޯޓަށް އަރައި، ބޯޓްގެ އިސް ފަޅުވެރިންނާ ބައްދަލުކޮށް ވާހަަކަ ދައްކާފަ އެވެ.

ފިނިކުރެވޭ ނިޒާމެއް ނެތި ރައްކާތެރި ނޫން ގޮތުގައި ބަންދުކޮށްގެން މާލެއިން ކުޅުދުއްފުއްޓަށް އެތެރެކުރާ ފިނިކުރި ބާވަތްތައް ބޭނުން ނުކުރުމަށް ކުޅުދުއްފުށީ ޕަބުލިކް ހެލްތުން އިއްޔެ ވަނީ އަންގައިފި އެވެ.

އިއްޔެ ކުޅުދުއްފުއްޓަށް ބަހާދަރު ބޯޓުން ގެނައި އެއްގަމު މަހުގެ ބާވަތްތައް ކެއުމުގައި ބޭނުންކުރުމަކީ ރައްކާތެރިކަމެއް ނޫން ކަމަށް ވެސް ޕަބުލިކް ހެލްތުން ވަނީ އަންގާފަ އެވެ.އަދި އެތަކެތި ވިއްކުމަށް ގެންދިޔަ 13 ތަނެއްގެ ނަން ތައް ވެސް އެފަރާތުން ވަނީ އާއްމުކޮށްފަ އެވެ.