“ފަހި ދަރަނި” ނަމުގައި ކްރެޑިޓް ސްކީމެއް ހއ.އަތޮޅުގައި ތައާރަފު ކުރަނީ

“ފަހި ދަރަނި” ނަމުގައި ހއ. އަތޮޅުގައި މަސައްކަތް ކުރާ މުވައްޒަފުންނަށް ހާއްސަ ކްރެޑިޓް ސްކީމެއް ތައާރަފް ކުރަން އެ އަތޮޅުގެ ކައުންސިލުން ނިންމައިފި އެވެ.

އެ ކައުންސިލުން މި ސްކީމް ތައާރަފު ކުރަން ނިންމީ އިއްޔެ ކަމަށާއި މި ކްރެޑިޓް ސްކީމްގައި ކޮންމެ ފަރާތަކަށް ދޫކުރަން ހަމަޖެހިފައި ވަނީ 15000 ރުފިޔާގެ އިލެކްޓޮރޯނިކް ތަކެތި ކަމަށް ހއ. އަތޮޅު ކައުންސިލްގެ ބާރަށު ދާއިރާގެ ކައުންސިލް މެންބަރު އަލީ ޝަމީމް ވިދާޅުވިއެވެ.

އޭނާ ވިދާޅުވީ މި ސްކީމްއަކީ ހަމައެކަނި ސަރުކާރާއި ސަރުކާރު ހިއްސާވާ ކުންފުނިތަކުގައި އެ އަތޮޅު ތެރޭގައި މަސައްކަތް ކުރާ މުވައްޒަފުންނަށް ބައިވެރިވެވޭނެ ސްކީމްއެއް ކަމަށެވެ. އަދި މި ސްކީމްގައި ދޫކުރެވޭ ތަކެތިން 10 ޕަސެންޓް އިންޓްރެސްޓް އެކުލެވޭނެ ކަމަށްވެސް ޝަމީމް ވިދާޅުވި އެވެ.

ޝަމީމް ވިދާޅުވީ އެ ސްކީމް ތައާރަފް ކުރުމަށްޓަކައި ހަދަން ޖެހޭ އުސޫލާއި ގަވައިދުތައް ތައްޔާރުވެ ނިމިފައިވާ ކަމަށެވެ. އަދި އަންނަ ހަފްތާގައި އެ ސްކީމް ތައާރަފުކޮށް އަތޮޅުގެ ރައްޔިތުންނާ ހިއްސާ ކުރުމަށް ހަމަޖެހިފައިވާ ކަމަށެވެ.

މި ސްކީމްގެ ދަށުން ދޫކުރާ ތަކެތީގެ ތެރެއިން ލެޕް ޓޮޕާއި ފޯނާއި ރިފުރިޖިރޭޓަރ ފަދަ ތަކެތި ހިމެނޭ ކަމަށް ޝަމީމް ސީ އެން އެމް ނޫހާ ހަވާލާދީ ބުނެފައި ވެއެވެ.