ށ. އަތޮޅުން ޑެންގީ 18 ކޭސް. އެއަތޮޅުގެ ރަށްތައް ފޮގް ކުރަން މިއަދު ފަށަނީ

އާދަޔާ ހިލާފަށް ޑެންގީ ހުން ފެތުރެމުންދާތީ މަދިރި ކޮންޓްރޯލްކުރުމުގެ ގޮތުން ކުރުމަށް ހަމަޖައްސާފައިވާ ޕްރޮގްރާމްގެ ދަށުން ށ. އަތޮޅުގެ ރަށްތައް ފޮގް ކުރުމުގެ މަސައްކަތް މިއަދު ފަށައިފި އެވެ.

ޑެންގީ ހުން މި ވަގުތު ރާއްޖޭގައި ހަލުވިކަމާ އެކު ފެތުރެމުންދާ އިރު، އެ ހުން ޖެހިގެން އަތޮޅުތެރެއިން އެންމެ ގިނައިން ރިޕޯޓްކޮށްފައި ވަނީ ށ. އަތޮޅުންނެވެ.

ށ. އަތޮޅު ހޮސްޕިޓަލުގެ މެޑިކަލް އޮފިޝަލް ހަމްދޫން ނަސީމް މިނޫހަށް ވިދާޅުވީ މިހާތަނަށް ޑެންގީ ހުމުގެ 18 ކޭސް އެއް ރިޕޯޓްކޮށްފައިވާ ކަމަށެވެ.

އޭނާ ވިދާޅުވީ އެންމެ އަލުވިކަމާ އެކު ޑެންގީ ފެތުރެމުންދަނީ އެއަތޮޅު މިލަންދޫގައި އާއި ފޯކައިދޫގަ ކަމަށެވެ. އަދި ފުނަދޫއިން ވެސް ރިޕޯޓްކޮށްފައިވާ ކަމަށެވެ.

” މިއަތޮޅުގައި އެންމެ ގިނައިން ރިޕޯޓްކޮށްފައިވަނީ މިލަންދޫއިންނާއި ފޯކައިދޫއިން. މިވަގުތު ފޯކައިދޫއިން ރިޕޯޓުން އައުން މަދު އެކަމަކު މިލަންދޫގައި “ކަންޓިނިއުއަސް” ކޮށް ރިޕޯޓް ލިބެމުންދަނީ” ހަމްދޫން ވިދާޅުވި އެވެ.

ށ. އަތޮޅުގައި އުއްފަދާފައިވާ ޓާސް ފޯސް–

ށ. ޕަބުލިކް އެލްތް އޮފިޝަލް އަހުމަދު ޒާހިދު ވިދާޅުވީ މަދިރި ކޮންޓްރޯލް ކުރުމަށް އެ އަތޮޅު ރަށްރަށުގައި މިހާރު ޕްރޮގްރާމްތަކެއް ފަށާފައިވާ ކަމަށެވެ. އެގޮތުން އެކުލަވާލާފައިވާ ޓާސްކްފޯހެއްގެ ދަށުން އާންމުންނާ ގުޅިގެން ރަށުތެރެ ސާފުކުރުމާއި މަދިރި އުފެދޭ ގޮތަށް ހުރި ތަންތަން ނައްތާލުމުގެ އިތުރުން ރަށު ތެރެ ފޮގް ކުރުމުގެ މަސައްކަތް ކުރަމުން އަންނަ ކަމަށެވެ.

އޭނާ ވިދާޅުވީ މަދިރި ނައްތާލުމުގެ ހާއްސަ ހަރަކާތަކެއް ހޮނިހިރު ދުވަހު ފޮނަދޫގައި ކުރިއަށްގެންދާނެ ކަމަށާއި މަދިރި އަލާވާ ތަންތަން ނައްތާލުމަށް ފަހު ފޮގްކުރާނެ ކަމަށެވެ.

ޑެންގީގެ އަލާމާތްތަކުގެ ތެރޭގައި ހުންނަނީ އާންމުކޮށް ޖެހޭ ރޯގާތަކާ ގުޅިގެން ވެސް ފެންނަ ބައެއް އަލާމާތްތަކެކެވެ. އެގޮތުން ހުންއައުމާ އެކު ބޮލުގައި ރިއްސުމާއި ހުޅުހުޅުގައި ރިއްސުމާއި ހޮޑުލެވުމާއި މޭ ނުބައި ކުރުމާއި ގައިގައި ރަތްކުލައިގެ ކުދިކުދި ބިހިތަކެއް ނުވަތަ ސްކިން ރޭޝްއެއް ނެގުން ހިމެނެ އެވެ. ނަމަވެސް ޑެންގީކަން އެނގޭނެ ސީދާ ވަކި އަލާމާތެއް ނުހުންނަ ކަމަށް ވެސް އެޗްޕީއޭ އިން މައުލޫމާތުދެ އެވެ.

ޑެންގީގެ ނުރައްކާތެރި އަލާމާތެއް ފެނިއްޖެ ނަމަ ވީ އެންމެ އަވަހަކަށް ޑޮކްޓަރަށް ދެއްކުމަށް އިސްކަންދޭންޖެހެ އެވެ. ނުރައްކާތެރި އަލާމާތްތަކުގެ ތެރޭގައި ހިމެނެނީ ހަށިގަނޑުން ފެން މަދުވެ މާބޮޑަށް ވަރުބަލިވުމާއި ހަށިގަނޑުގެ ކޮންމެ ވެސް ތަނަކުން ލޭ އައުމާއި މާގިނައިން ހޮޑުލުމާއި ހޮޑުލާއިރު ލޭއައުމާއި މާބޮޑަށް ބަނޑުގައި ރިއްސުމެވެ.