ބީއެމްއެލް މޮބައިލް ބޭންކިންގ އެޕަށް ބޮޑު ތަރުހީބެއް

މި މަހުގެ 5 ވަނަ ދުވަހު ބޭންކް އޮފް މޯލްޑިވްސް އިން ލޯންޗްކުރި މޮބައިލް ބޭންކިންގ އެޕް އަށް ކަސްޓަމަރުންގެ ބޮޑު ތަރުހީބެއް ލިބި މި އެޕް ދަނީ ކަސްޓަމަރުންގެ މެދުގައި ވަރަށް ބޮޑު މަގުބޫލު ކަމެއް ހޯދަމުންނެވެ.

ހަމައެކަނި ހަފްތާއެއްގެ ތެރޭގައި 21000 ވުރެ ގިނަ މީހުން މި އެޕް ޑައުންލޯޑްކޮށްފައި ވާއިރު ގޫގުލް ޕްލޭ ސްޓޯރ އަދި އެޕަލް ސްޓޯރގައި ބީ.އެމް.އެލް މޮބައިލް ބޭންކިންގ އެޕްއަށް ވަނީ  4.7 ގެ އެވަރެޖް ރޭޓިން ލިބިފައި އެވެ.

ސިކުންތުކޮޅެއްގެތެރޭ އެކައުންޓް ބަލައި ލުމާއި ޓްރާންސްފަރ ކުރުމާއި ބިލްތަކަށް ފައިސާ ދެއްކޭ މި މޮބައިލް އެޕްއަށް ކަސްޓަމަރުންގެ ފަރާތުން ލިބެމުންދާ ތަރުހީބާ މެދު ވަރަށް ހިތްހަމަޖެހޭކަމަށް ބޭންކުގެ ރީޓެއިލް ބޭންކިންގ ޑައިރެކްޓަރ މުހައްމަދު ޝަރީފް ވިދާޅުވި އެވެ.

މުހައްމަދު ޝަރީފް މިދާޅުވެފައި ވަނީ އެޕް ތައްޔާރުކުރުމުގެ ބޭނުމަކަށްވެފައި ވާނީ ކަސްޓަމަރުންނަށް ވީހާވެސް ފަސޭހަމާއެކު ބޭންކިންގ ހިދުމަތް ދިނުން ކަމަށެވެ. އަދި ކަސްޓަަމަރުން މި އެޕް ބަލައިގަނެ ބޭންކިންގ ހިދުމަތް ލުއި ފަސޭހަކަމާއެކު ބޭނުންކުރަމުން ދާކަން ޝަރީފް ފާހަގަކުރެއްވި އެވެ.

ބީ.އެމް.އެލް މޮބައިލް ބޭންކިންގ އެޕް ގެ އެހީގައި އެންމެ ކައިރީގައިވާ ބްރާންޗް ނުވަތަ އޭޓީއެމް ހުރިތަން ބާލާލެވެއެވެ. އަދި މިހާރު އިންޓަރނެޓް ބޭންކިންގ ހިދުމަތް ބޭނުން ކުރައްވާ ފަރާތްތައްވަނީ ބީއެމްއެލް އެޕަށް އޮޓޮމެޓިކުން ރަޖިސްޓަރކުރެވިފައެވެ.

ބީއެމްއެލްގެ ކަސްޓަމަރުން ފާހަގަ ކުރާގޮތުން މިއީ މިހާތަނަށް ބޭންކުން ތައާރަފް ކުރި އެންމެ ފުރިހަމަ ހިދުމަތެވެ.