އިންޑިޔާގައި ބަރަހަނާ ސައިޓްތަކަށް ނުވަދެވޭ ގޮތް ހަދައިފި

އިންޑިޔާގައިި ގިނަ އަދަދެއްގެ ބަރަހަނާ ސައިޓްތަކަށް ނުވަދެވޭ ގޮތަށް ބަންދު ކޮށްފި އެވެ.

އިންޑިޔާގެ މީޑިއާ ރިޕޯރޓް ތަކުން ދައްކާ ގޮތުގައި އިންޑިޔާ ސަރުކާރުގެ އެދުމުގެ ދަށުން ހަފްތާއެއްގެ ތެރޭގައި 850 އަށް ވުރެ ގިނަ ސައިޓްތައް އިންޑިޔާގައި ވަނީ ބަންދު ކޮށްފަ އެވެ. އަދި އޭގެ ތެރޭގައި އެޑަލްޓް ޑޭޓިން ސައިޓްތައް ވެސް ހިމެނޭކަމަށް ރިޕޯރޓްތަކުގައި ވެއެވެ.

އިންޑިޔާގެ ޓެލެކޮމިއުނިކޭޝަން ޑިޕާރޓްމެންޓްގެ ސްޕޯކްސްޕާސަން ބުނިގޮތުގައި ބަރަހަނާ ސައިޓްތައް ބަންދު ކުރެވުނީ ސުޕްރިމް ކޯޓުގައި ކުރިއަށްދާ ޝަރީއަތެއްގެ ސަބަބުން ކަމަށެވެ. އަދި މި އެކަމާ ބެހޭގޮތުން އިތުރު އެއްޗެއް ދަންނަވަން ނޭނގޭކަަމަށް ވެސް އޭނާއާ ހަވާލާދީ އިންޑިޔާގެ މީޑިޔާއިން ބުނެފައިވެ އެވެ.

އިންޑިޔާގައި ބަރަހަނާ ސައިޓްތަކަށް ނުވަދޭވޭ ގޮތް ހެދުމާ ގުޅިގެން އިންޑިޔާގެ ބައެއް ތަރިން ވެސް ވަނީ އެކަމާ ނުރުހުން ފާޅުކޮށްފަ އެވެ.

އެގޮތުން ސޯނަމް ކަޕޫރު އިއްޔެގެ ވަގުތެއްގައި ކުރި ޓުވީޓެއްގައި ވަނީ އެކަން ހާމަވެގެން ގޮސްފައި އެވެ. ސޯނަމް ކުރި ޓުވީޓްގައި ބުނެފައިވަނީ ބަރަހަނާ ސައިޓްތައް ބަންދު ކުރުމުން މީހުންގެ ވިސްނުމަކަށް ބަދަލެއް އަންނާނެ ކަމަށް ހީކުރުން މިއީ ވަރަށް މޮޔަ ކަމެއްކަމަށެވެ. އަދި މި ވިސްނުމާ މެދު ލަދުގަންނަވާ ކަމަށްވެސް އޭނާގެ ޓުވީޓުން ހާމަވެގެން ދިޔައެވެ.

ސޯނަމް ކަޕޫރުގެ ޓްވީޓް–

މީގެ އިތުރުން އުދޭ ޗޯޕްރާ، ރާމް ގޮޕާލް ވަރުމާ، ޗެތަން ބަގަތު އަދި ވިޝާލް ދަދްލާނީ ވެސް ވަނީ މިކަމާ ގުޅިގެން ނުރުހުން ފާޅުކޮށް ޓުވީޓްކޮށްފައި އެވެ.

އިންޑިޔާއަކީ ޗައިނާއަށް ފަހު ދެވަނައަށް އިންޓަނެޓްގެ ހިދުމަތް ބޭނުންކުރަމުން އަންނަ އެންމެ ބޮޑު އާބާދީއެއް އޮންނަ ގައުމެވެ.