ކުޑަ ކުއްޖަކާއެކު ގަދަ ކަމުން ޖިންސީ އަމަލު ހިންގި މީހަކު 10 އަހަރަށް ޖަލަށް ލުމަށް ހުކުމް ކޮށްފި

ކުޑަ ކުއްޖަކާއެކު ގަދަ ކަމުން ޖިންސީ އަމަލު ހިންގި ށ ފުނަދޫ މީހަކު 10 އަހަރަށް ޖަލަށް ލުމަށް ހުކުމް ކޮށްފި އެވެ.

ކުށް ސާބިތުވުމާ ގުޅިގެން ށ. ފުނަދޫ މެޖިސްޓްރޭޓް ކޯޓުންހުކުމްކޮށްފައިވަނީ ށ. ފުނަދޫ، ނަސީމީގެ، މުހައްމަދު ރިޝާން (26އ) ގެ މައްޗަށެވެ.

މުހައްމަދު ރިޝާންގެ މައްޗަށް މި ދައުވާ އުފުލާފައިވަނީ 16 އަހަރުގެ އަންހެން ކުއްޖަކާއެކު މިދިޔަ އަހަރުގެ ސެޕްޓެމްބަރު މަހު 8 ވަނަ ދުވަހު ޖިންސީ އަމަލު ހިންގާފައިވާ މައްސަލައަކާ ގުޅިގެންނެވެ.

މި މައްސަލައާ ގުޅިގެން ށ. ފުނަދޫ މެޖިސްޓްރޭޓް ކޯޓުން ކޮށްފައިވާ ޙުކުމުގައި ބުނަނީ 2014 ސެޕްޓެމްބަރު 08 ގައި ޖިންސީ އަނިޔާ ލިބިފައިވާކަން އަނިޔާލިބުނު ކުއްޖާގެ މެޑިކޯ ލީގަލް ރިޕޯޓުން އެނގެން އޮންނަ ކަމަށާއި، ހެކިންގެ ހެކިބަހުންނާއި މައްސަލައިގެ ވަށައިގެންވާ ކަންތައްތަކުގެ މައްޗަށް ބަލާއިރު ކުޑަކުދިންނަށް ޖިންސީ ގޯނާކުރާމީހުންނާމެދު ހާއްސަ އުސޫލުތަކަކަށް އަމަލު ކުރުމުގެ ގާނޫނުގައި ބުނާ މިންވަރަށް ހެކި ލިބިފައިވާކަމަށެވެ.

އޭގެ އިތުރުން، މި ކުށަކީ ވަހަކަ ގާނޫނާތަކަކުން ތަޖްރީމް ކުރެވިފައިވާ ކުށެއްކަންވެސް ޙުކުމުގައި ފާހަގަކޮށްފަވެއެވެ. އެހެންކަމުން، މުޙައްމަދު ރިޝާންގެ މައްޗަށް ދައުލަތުން އުފުލާފައިވާ ކުޑަކުއްޖަކާއެކު ޖިންސީ އަމަލު ހިންގުމުގެ ކުށުގެ ދައުވާ ސާބިތުވާކަމަށް ކަނޑައަޅައި ގާނޫނު ނަމްބަރު 12/2009، ކުޑަކުދިންނަށް ޖިންސީ ގޯނާކުރާމީހުންނާމެދު ހާއްސަ އުސޫލުތަކަކަށް އަމަލު ކުރުމުގެ ގާނޫނު ގެ 3 ވަނަ މާއްދާގެ (ހ) އާ ޙަވާލާދީ އެމާއްދާގެ (ނ) ގެ ދަށުން މުހައްމަދު ރިޝާން 10 އަހަރު ދުވަހުގެ މުއްދަތަަށް ޖަލަށްލުމަށް ހުކުމްކުރާ ކަމަށްވެސް ށ. ފުނަދޫ ކޯޓުގެ ޤަޞީއްޔާގައި ވެއެވެ.