ކުޅުދުއްފުއްޓާއި ދިއްދޫ ހޮސްޕިޓަލުގައި ތެލެސީމިއާއަށް ޓެސްޓު ކުރެވޭ ގޮތް ހަދަނީ

ކުޅުދުއްފުށީ ރީޖަނަލް ހޮސްޕިޓަލާއި ހއ. އަތޮޅު ހޮސްޕިޓަލް އަދި އިތުރު 7 ސަރަހައްދެއްގައި ތެލެސީމިއާ ސްކްރީން ކުރުމުގެ ހިދުމަތް މިއަހަރު ނިމެންވާއިރަށް ދޭން ފަށާނެ ކަމަށް ހެލްތު މިނިސްޓަރު އިރުތިޝާމް އާދަމް ވިދާޅުވެއްޖެ އެވެ.

އަންނަ އަހަރު ފެށުމުގެ ކުރިން ރާއްޖޭގެ ނުވަ ސަރަހައްދަކުން ތެލެސީމިއާ ސްކްރީން ކުރުމުގެ ހިދުމަތް ލިބިގެންދާއިރު މިހާރު ވަނީ އެ ހިދުމަތް އައްޑޫ ސިޓީ ހިތަދޫގެ ރީޖަނަލް ހޮސްޕިޓަލްގައި ގާއިމު ކޮށްފައިކަަމަށް މޯލްޑިވްސް ބަލްޑް ސާވިސް (އެމްބީއެސް) އާއެކު މިއަދު ބޭއްވި ނޫސްވެރިންގެ ބައްދަލުވުމުގަައި ވާހަކަފުޅު ދައްކަވަމުން ހެލްތު މިނިސްޓަރު ވިދާޅުވިއެވެ.

ހދ. ކުޅުދުއްފުށީ ރީޖަނަލް ހޮސްޕިޓަލާއި ހއ. އަތޮޅު ހޮސްޕިޓަލުގެ އިތުރުން ތެލެސީމިއާ ސްކްރީން ކުރުމުގެ ހިދުމަތް ގާއިމް ކުރުމަށް ހަމަޖެހިފައި ވަނީ ރ. އުނގޫފާރު ރީޖަނަލް ހޮސްޕިޓަލާއި ޑރ. އަބްދުއްސަމަދު ރީޖަނަލް ހޮސްޕިޓަލާއި ހުޅުމާލޭ ހޮސްޕިޓަލާއި ، ދިއްދޫ އާއި ގއ. އަތޮޅު ހޮސްޕިޓަލް އަދި ޏ. ފުވައްމުލަކު ހޮސްޕިޓަލުގައި އެވެ.

ތެލެސީމިއާގެ ކުދިންނަށް ފަސޭހަތަކެއް ކޮށްދިނުމަށްޓަކައި ތެލެސީމިއާ ކުދިން ބޭނުންވާ ބްލަޑް ފިލްޓަރާއި އެނޫން ވެސް ބޭނުންވާ ބޭސްތައް އާސަންދަ މެދުވެރިކޮށް ހިލޭ ލިބޭނޭގޮތްތަކެއް ހަމަޖައްސައިދޭނެ ކަމަށް މިނިސްޓަރު އިރުތިޝަމް ވިދާޅުވިއެވެ.

ސަރުކާރުގެ ފަރާތުން ތެލެސީމިއާގެ ހިދުމަތް ރަނގަޅު ކުރުމަށް 13 މިލިއަން ރުފިޔާ ހަރަދުކޮށް ތެލެސީމިއާ ޖެހިފައިވާ ކުދިންނަށް 6039 ފިލްޓަރު ސަރުކާރުން ގަނެފައިވާ ކަމަށް މިނިސްޓަރު ވިދާޅުވިއެވެ. އަދި އަތޮޅުތަކުގެ ތެލެސީމިއާ ޖެހިފައިވާ ކުދިންނަށް ބޭސް ފަދަ ތަކެތި ފޯރު ކޮށްދިނުމަށް އެމްބީއެސް އިން ދަނީ ގިނަ މަސައްކަތް ތަކެއް ކުރަމުން ކަމަށްވެސް އިރުތިޝަމް ވިދާޅުވިއެވެ.