“މޯލްޑިވިއަން އައިޑޮލް” ގެ އޮޑިޝަން ކުޅުދުއްފުށީގައި ބާއްވަނީ

މޯލްޑިވިއަން އައިޑޮލްގެ އޮޑިޝަން ކުޅުދުއްފުށީގައި ބޭއްވުމަށް ހަމަޖެހިއްޖެ އެވެ .

ރާއްޖޭގެ ތާރީހުގައިވެސް ފްރެންޗައިޒް އުސޫލުން ބާއްވާ އެންމެ ފުރަތަމަ ޝޯވ، “މޯލްޑިވިއަން އައިޑަލް”ގެ އޮޑިޝަން ރާއްޖޭގެ 4 ސަރަހައްދެއްގައި ބޭޢްވުމަށް ހަމަޖެހިފައިވެއެވެ. އެއީ އައްޑު އަތޮޅާއި ހދ އަތޮޅާއި ގދ އަދި ޅ އަތޮޅުގައި އެވެ.

އެގޮތުން ކަންތައްތައް ހަމަޖެއްސުމަށްޓަކައި ޝޯ ޓީމްގެ 2 މެމްބަރުން ވަނީ އިއްޔެ ކުޅުދުއްފުށި އައިސްފައެވެ. އަދި ރޭ ވަނީ ބައެއް ޒުވާނުންނާއި ބައްދަލުކުރައްވާ މިކަމާ ބެހޭގޮތުން މައުލޫމާތު ދީފައެވެ.

މޯލްޑިވިއަން އައިޑޮލް އާ ބެހޭ ގޮތުން މައުލޫމާތު ދިނުމަށް ބޭއްވި ބައްދަލުވުމުގެ ތެރެއިން–ފޮޓޯ: ނާސިދު

މި ބައްދަލުވުމުގައި ޝޯގެ ކްރިއޭޓިވް ޑިރެކްޓަރ ވާހަކަ ދައްކަމުނެ ބުނެފައިވަނީ ކުޅުދުއްފުށި އޮޑިޝަން ވަރަށް އަވަހަށް ބޭއްވިގެން ދާނެކަމަށެވެ. އަދި މި އޮޑިޝަނުގައި ލަވަ ކިޔުމަށް ޝައުގުވެރިކަން ހުންނަ ވީހާވެސް ގިނަ މީހުން ބައިވެރިވާނެ ކަމަށް އުންމީދު ކުރާކަމަށެވެ.

އޭނާ އިތުރަށް ބުނެފައިވަނީ އޮޑިޝަންގައި ހޮވޭ މީހުން މާލޭ އޮޑިޝަން ރައުންޑަކަށް ގެންދެވޭނެ ކަމަށާއި މާލޭގައި އެ ކުދިން ތިބުމުގެ ހުރިހާ ކަންތައްތަކެއް އެފަރާތުން ހަމަޖައްސައި ދޭނެ ކަމަށެވެ.

ތިން ލެވެލްއަކަށް ބަހާލައިގެން މި ޝޯވގެ އޮޑިޝަންތައް ކުރިއަށް ގެންދިއުމަށް ނިންމާފައި ވާއިރު، ފުރަތަމަ މާލޭގައި ބޭއްވުމަށް ހަމަޖެހިފައިވާ އޯޕަން އޮޑިޝަން އާއި ތިއޭޓަރ އޮޑިޝަންގައިވެސް މިޔުޒިކާއި ނުލައި ބައިވެރިންނަށް އެފަރާތްތަކުގެ ލަވަކިޔުމުގެ ހުނަރު ދައްކާލުމުގެ ފުރުސަތު ލިބިގެންދާނެއެވެ. އެއަށްފަހު ބޭއްވޭ ޕިއާނޯ ރައުންޑުން ހޮވޭ ފަރާތްތަކަށް ގްރޭންޑް އިވެންޓް ނުވަތަ “ގާލާ ޝޯވ”ގައި ލަވަކިޔުމުގެ ފުރުސަތު ލިބިގެންދާނެއެވެ.