ކުޑަކުދިންނާ ގުޅޭ ޚަބަރު ފެތުރުމުގައި ގެންގުޅޭ އުސޫލުތަކާ ބެހޭގޮތުން މައުލޫމާތު ދީފި

ކުޑަކުދިންނާ ގުޅޭ ޚަބަރާއި މައުލޫމާތު ހާމަކުރުމުގައި ގެންގުޅޭ އުސޫލުތަކާ ބެހޭ ގޮތުން މައުލޫމާތު ދިނުމުގެ ޕްރޮގުރާމްތަކެއް މީޑިއާ ކައުންސިލުން ކުޅުދުއްފުށީގައި ކުރިއަށްގެން ގޮސްފި އެވެ.

އެގޮތުން މީޑިޔާ ކައުންސިލުން ވަނީ ޖަލާލުއްދީން ސްކޫލް އަދި އަފީފުއްދީން ސްކޫލްގެ ބެލެނިވެރިންނަށާއި ދަރިވަރުންނަށް ކުޑަކުދިންގެ ހަބަރާއި މައުލޫމާތު ހާމަކުރުމުގެ ގައިޑްލައިނާ ގުޅޭ މައުލޫމާތު ދީފަ އެވެ.

އަދި މީޑިއާ ކައުންސިލުން ވަނީ ކުޅުދުއްފުށީ ކައުންސިލާއި ކުޅުދުއްފުށި އޮންލައިނާ ވެސް ބައްދަލުކޮށް މައުލޫމާތު ދީފަ އެވެ. މިރޭ ހދ މިކަމާ ބެހޭ ގޮތުން ހދ އަތޮޅު ކައުންސިލާ ބައްދަލުކުރަން ވަނީ ހަމަޖެހިފަ އެވެ.

މީޑިއާ ކައުންސިލުން އަފީފުއްދީން ސްކޫލުގެ ކުރިއަށްގެންދިޔަ ޝެޝަން–ފޮޓޯ: މީޑިއާ ކައުންސިލް

މި ސެޝަންގައި ވަނީ މީޑިއާ ކައުންސިލްގެ ތާއާރަފޮކޮށް މީޑިއާ ކައުންސިލް އުފެދިގެން އަައި ގޮތާއި މީޑިޔާ ކައުންސިލަށް ޝަކުވާ ހުށާޅާނެ ގޮތުގެ މައުލޫމާތު ދީފައި އެވެ. އަދި ޚަބަރަކީ ކޮބައިކަމާއި ޚަބަރު ހަދާނެގޮތާއި ޚަބަރު ހެދުމުގައި ގެންގުޅޭ އުސޫލުތަކާއި ހަމަތަކުގެ މައުލޫމާތު ވެސް ދީފައި އެވެ.

މި ދަތުރުގައި މައިގަނޑު ގޮތެއްގައި ވަރަށް ފުޅާކޮށް ވަރަށް ގިނަ މަސައްކަތްތަކެއް ކުރެވިގެން ދިޔަކަމަށާއި ކުޅުދުއްފުށި ރައްޔިތުންގެ ފަރާތުން މިކަމަށް ލިބިގެންދިޔަ އެއްބަރުލުމާ މެދު ވަރަށް ހިތްހަމަޖެހިލައްވާކަމަށް މީޑިޔާ ކައުންސިލްގެ މެމްބަރު ހިދާޔަތުﷲ ކުޅުދުއްފުށި އޮންލައިނަށް ދެއްވި އިންޓަވިއުއެއްގައި ވިދާޅުވި އެވެ..

މި ދަތުރުގައި ހދ ގެ އިތުރުން ލ އަތޮޅަށާއި ގދ ތިނަދޫގައި ވެސް މި ޕްރޮގުރާމް ހިންގުމަށް ހަމަޖެހިފައިވާ ކަމަށް ހިދާޔަތުﷲ ބުނިއެވެ.