ފުނަދޫ މަގު ހެދުމުގެ މަޝްރޫއު އިފްތިތާހު ކޮށްފި

ށ.ފުނަދޫގައި މަގުހެދުމުގެ މަސައްކަތް ރޭ އިފްތިތާހުކޮށްފި އެވެ.

ށ.ފުނަދޫގައި ބޭއްވި  ޚާއްސަ ރަސްމިއްޔާތެއްގައި މަސައްކަތް އިފްތިތާހު ކޮށްދެއްވީ މިނިސްޓަރ އޮފް ހައުސިންގ އެންޑް އިންފްރާސްޓްރަކޗރ ޑރ. މުޙައްމަދު މުއިއްޒުއާއި ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު އަލީ ސަލީމްއެވެ.

ފުނަދޫގައި ހެދުމަށް ހަމަޖެހިފައިވާ ދިހަ މަގުގެ އިތުރަށް އެރަށު ބަނދަރު މަތީގެ މަގުތައްވެސް ތާރުއަޅައިގެން ހެދުމަށް މިމަޝްރޫއު ތެރޭގައި ހިމެނުމަށް މިހާރު ނިންމަވާފައިވާ ކަމަށް ރަސްމިއްޔާތުގައި ވާހަކަފުޅުދައްކަވަމުން ހައުސިންގ މިނިސްޓަރ ޑރ. މުޙައްމަދު މުއިއްޒު ވިދާޅުވި އެވެ. އަދި މަގުހެދުމުގެ މަޝްރޫޢަށް ދައުލަތުގެ ބަޖެޓުން ސާޅީސް ހަމިލިއަނަށްވުރެ ގިނަ ރުފިޔާ ހަރަދުވާނެ ކަމަށް މިނިސްޓަރ ވިދާޅުވިއެވެ.

މިީގެ އިތުރުން ފުނަދޫގެ ތަރައްގީއަށް ކުރަން ރާވާފައިވާ މަޝްރޫޢަތަކުގެ ތެރެއިން އެރަށު އެއަރޕޯޓު ހެދުމަށް ބޭނުންވާ ތަފްސީލީ ހަރަދު ހޯދުމުގެ ގޮތުން މަސައްކަތްތަކެއް ކުރެވިފައިވާ ކަމަށާއި އީއައިއޭ ހެދުމަށް ތައްޔާރުވަމުންދާ ކަން މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.

ފުނަދޫގައި 3.3 ކިލޯމީޓަރުގެ 10 މަގު ހެދުމަހަމަޖެހިފައިވާ މި މަޝްރޫއު ހަވާލުކޮށްފައި ވަނީ އެމްޓީސީސީއާއެވެ. އެގޮތުން މަގު ހެދުމުގެ މަޝްރޫޢު ކުރިއަށް ގެންދިއުމަށް ހަމަޖެހިފައިވަނީ ހަތަރު ޑިޒައިނަކަށް ކަމަށާއި މަސައްކަތް ފެށުމަށް ބޭނުންވާ ސާމާނު ފުނަދޫއަށް މިހާރު ގެންގޮސްފައިވާ ކަމަށް އެމްޓީސީސީގެ ސީއީއޯ އަބްދުއް ރައްޒާޤު ޙަލީމް ވިދާޅުވި އެވެ.

މި ރަސްމިއްޔާތުގައި ވާހަކަދައްކަވަމުން ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު އަލީ ސަލީމް ވިދާޅުވީ، ފުނަދޫގެ ތަރައްގީއަށް ރައީސް ޔާމީންގެ ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާ ތަން ފެންނަމުންދާ ކަމަށާއި އަދި މިއަދު ފެށިގެންދިޔަ ބޮޑު މަޝްރޫއުގެ ސަބަބުން ފުނަދޫގެ ތަރައްގީއަށް ކުރިއެރުން ލިބިގެންދާނެ ކަމަށް ވިދާޅުވިއެވެ. އަދި ރައީސް ޔާމީންގެ ދުރުވިސްނޭ ސިޔާސަތުގެ ތެރެއިން ފުނަދޫގެ ހޮސްޕިޓަލްގެ ފެންވަރު މަތިކޮށް، ތިރީސް މިލިއަން ރުފިޔާ ޚަރަދުކޮށްގެން ފުނަދޫ ސްކޫލް ތަރައްގީކުރުމަށް ކުރިއަށް ގެންދަވާ މަޝްރޫއަށް އަލިއަޅުއްވާލެއްވިއެވެ.

މި މަޝްރޫޢުގެ ދަށުން، މަގު ހެދުމުގެ އިތުރުން، މަގުތަކުގެ ޕޭވްމަންޓު ހެދުމާއި، ފެން ހިއްދާ ނިޒާމު ގާއިމްކުރުމާއި، ކޭބަލް ޖަންގްޝަންތައް ގާއިމްކުރުމުގެ އިތުރުން ކޭބަލް އެޅުމަށް ބޭނުންވާ ހޮޅިލުމުގެ މަސައްކަތްވެސް ކުރުމަށްވަނީ ހަމަޖެހިފައެވެ. އަދި މިމަޝްރޫޢަށް 46 މިލިއަނަށްވުރެ ގިނަ ރުފިޔާ ހަރަދުވާނެ ކަމަށް ހައުސިންގ މިނިސްޓްރީން މައުލޫމާތު ދެއްވައެވެ.