ދިއްދޫގައި ދޯނި އެހެލާ ސަރަހައްދާއި ނެރު ފައިކަށި ހެދުމަށް ބަޔަކާ ހަވާލޮކޮށްފި

ހއ ދިއްދޫ ދޯނި އެހެލާ ސަރަހައްދާއި، ނެރުފައިކަށި ހެދުމުގެ މަސައްކަތް އެމް.ޓީ.ސީ.ސީއާ ހަވާލުކޮށްފިއެވެ.

މި މަޝްރޫޢުގެ އެއްބަސްވުމުގައި ސޮއިކުރުމަށް ހައުސިންގ މިނިސްޓްރީގައި ބޭއްވި ރަސްމިއްޔާތެއްގައި އެމް.ޓީ.ސީ.ސީއާ މަސައްކަތް ހަވާލު ކުރި ކަމުގެ އެއްބަސްވުމުގައި ސޮއިކުރެއްވީ މިނިސްޓަރ ޑރ. މުހައްމަދު މުއިއްޒުއާ، އެމް.ޓީ.ސީ.ސީގެ ސީ.އީ.އޯ އަބްދުއްރައްޒާގް ހަލީމްއެވެ.

ސަރުކާރުގެ ބަޖެޓުން 13.7 މިލިއަން ރުފިޔާ ހަރަދުކޮށްގެން ކުރިއަށްގެންދާ މިމަޝްރޫއަކީ އާއްމުކޮށް ދޯނި އެހެލާ ސަރަހައްދުތައް ހަދާވަރަށްވުރެ، ފުޅާކޮށް ކުރިއަށް ގެންދާ މަސައްކަތެއްކަން ހައުސިންގ މިނިސްޓަރ ޑރ. މުހައްމަދު މުއިއްޒު ވަނީ މި ރަސްމިއްޔާތުގައި ވާހަކަފުޅު ދައްކަވަމުން ވިދާޅުވެފައި އެވެ.

މުއިއްޒު ދެއްކެވި ވާހަކަފުޅުގައި، ދިއްދޫ ދޯނި އެހެލާ ސަރަހައްދު ހެދުމާއި، ނެރުފައިކަށި ހެދުމުގެ މަސައްކަތަކީ ދިއްދޫގައި ސަރުކާރުން ކުރެއްވުމަށް އެންމެ އިސްކަން ދެއްވާ މަޝްރޫޢުކަމަށާއި، ދާއިރާގެ މެންބަރު ޢަބްދުއްލަޠީފް މުޙައްމަދުގެ އެހީތެރިކަމާއެކު، މަޝްރޫޢު ބައްޓަން ކުރެވިފައިވަނީ ރަށުގެ ރައްޔިތުން ބޭނުންވާ ގޮތަށްކަމަށްވިދާޅުވިއެވެ.

160 ދުވަސް ތެރޭގައި ިއްދޫ ދޯނި އެހެލާ ސަރަހައްދު ހެދުމާއި، ނެރުފައިކަށި ހެދުމުގެ މަސައްކަތް ނިންމަވާނެ ކަމަށާއި މި ކަމުގެ ސަބަބުން ރައްޔިތުންނަށް، ހާއްސަކޮށް އޮޑިވެރިންނަށާއި މަސްވެރިންނަށް ބޭނުންވާ ފަސޭހަތަށް ލިބިގެންދާނެކަމަށް އެމް.ޓީ.ސީ.ސީގެ ސީ.އީ.އޯ އަބްދުއްރައްޒާގް ހަލީމް ވިދާޅުވިއެވެ.

މިރަސްމިއްޔާތުގައި ދިއްދޫ ދާއިރާގެ މެންބަރާއި ދިއްދޫ ކައުންސިލްގެ ރައީސް ދެއްކެވި ވާހަކަފުޅުގައި، މި މަސައްކަތަކީ ރަށުގެ ރައްޔިތުން ގިނަ ދުވަސްތަކެއްވަންދެން ކުރަން ބޭނުންވެފައިވާ ކަމެއްކަމަށާއި، ރައީސް އަބްދުﷲ ޔާމީންގެ ސަރުކާރުގައި އެކަން ހަގީގަތަކަށް ހެއްދެވުމަށް ސަރުކާރާއި، ހައުސިންގް މިނިސްޓަރ ކޮށްދެއްވި މަސައްކަތް ފާހަގަކުރައްވައި އެކަމަށްޓަކައި އެފަރާތްތަކަށްވަނީ ޝުކުރު އަދާކުރައްވާފައެވެ.

މި މަޝްރޫއުގެ ދަށުން ދިއްދޫގައި ދިއްދޫގެ ބީޗިން އޭރިއާއާ އެކު 90 މީޓަރުގެ ރިވެޓްމަންޓެއް ޖަހައި 90 މީޓަރުގެ ބްރޭކްވޯޓާއެއް ހަދައި ފުންކުރުމަށް ވަނީ ހަމަޖެހިފައި އެވެ.