މަކުނުދޫން ކާޑުގެ ބާވަތްތައް ހުސްވުމުން ކުޅުދުއްފުށިން ކާޑު ފޮނުވައިފި

ހދ މަކުނުދޫއިން ކާޑުގެ ބާވަތްތައް ހުސްވުމާ ގުޅިގެން އެރަށަށް މިއަދު ކާޑުގެ ބާވަތްތައް ފޮނުވައިފި އެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން ހދ އަތޮޅު ކައުންސިލްގެ މީޑިއާ ކޯޑިނޭޓަރ މުހައިމިން ވިދާޅުވީ ކާޑުގެ ބާވަތްތައް ހުސްވެގެން އެރަށުން ރިޕޯޓްކޮށްފައިވަނީ އިއްޔެ ކަމަށާއި ރިޕޯޓް ކުރުމާ ގުޅިގެން އެސްޓީއޯ ކުޅުދުއްފުށީ ބްރާންޗާ ވާހަކަ ދައްކައިގެން ސްޓޮކް ހަމަޖެއްސުމަށް ފަހު މިއަދު މެންދުރު ފަހު ފޮނުވާލާފައި ވާނެ ކަމަށެވެ.

އެރަށަށް  ފޮނުވާފައިވަނީ 20 ބަސްތާ ހަކުރާއި 25 ބަސްތާ ހަނޑޫ އަދި 25 ބަސްތާ ފުށްކަމަށް މުހައިމިން ވިދާޅުވި އެވެ.

މި ނޫހަށް މައުލޫމާތު ލިބިފައިވާ ގޮތުގައި މަކުނުދޫއިން ކާޑުގެ ބާވަތްތައް ހުސްވެފައިވަނީ މޫސުން ގޯސްވެ ދަތުރުފަތުރު ކުރުމަށް އުދަނގޫތަކެއް ކުރިމަތިވެފައިވާތީ އެވެ.