މޯބައިލް ފޯނު ވިއްކާ ފިހާރައެއް ފަޅާލައި ގިނަ އަދަދެއްގެ ފޯން ވަގަށް ގެންގޮސްފި

ކުޅުދުއްފުށިގައި ހުންނަ އުރީދޫގެ ބިޒްނަސް ޕާޓްނަރު “ގާޑިޔާ 1” ފިހާރަ ފަޅާލައި ގިނަ އަދަދެއް ފޯން ވަގަށް ގެންގޮސްފި އެވެ.

ކުރީގެ ހޮސްޕިޓަލް ހިންގި އިމާރާތުގައި ބަންޑާރަމަގަށް ވާ ގޮތަށް ހުންނަ މި ފިހާރައަށް ވަގު ވަދެފައިވަނީ ސީލިންގ ހަލާކޮށްލައިގެންނެވެ. އަދި އިމާރާތުގެ ތެރެއަށް ވަގު ވަދެފައިވަނީ ޓިނު ނަގައިގެން ވަދެ، ފާރެއްތަޅާލައިގެން އެހިސާބު ހުރަސްކޮށް ފިހާރައިގެ ސީލިންގުން ގޮޅިއެއް ކަނޑައިގެންނެވެ .

ފިހާރައިގެ މުވައްޒަފަކު ބުނީ މޯބައިލް ފޯނާއި ފޯނު ކާޑު ވަގަށް ގެންގޮސްފައިވާ ކަމަށެވެ . އަދި ވަގަށް ގެންގޮސްފައިވަނީ ކިހާ ފައިސާގެ މުދަލެއް ކަމެއް ސީދާ ބުންނަށް ނޭގޭ ކަމަށް އޭނާ ބުންޏެވެ.

ފިހާރަ ފަޅާލައިގެން ވައްކަން ކޮށްފައިވާކަން އެނގިފައިވަނީ ފިހާރައިގެ ވެރިފަރާތް މިއަދު ހެނދުނު 9:00 ހާއިރު ފިހާރައަށް ވަނުމުންނެވެ. ފިހާރަ ފަޅާލައި ވައްކަންކޮށްފައިވަނީ ރޭ ފިހާރަ ބަންދު ކުރިފަހުންނެވެ.

ފަޅާލައި ވައްކަން ކުރި މިފިހާރައަކީ ރޭގަނޑު ވޮޗަރުންވެސް ތިބޭ ފިހާރައެއް ކަން ފާހަގަކުރެވެ އެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން މިހާރުދަނީ ތަޙްޤީޤްކުރަމުންނެވެ.