މަސްތުވާތަކެއްޗާއެކު މަކުނުދޫއިން މީހަކު ހައްޔަރުކޮށްފި

މަސްތުވާތަކެއްޗާއެކު ހދ މަކުނުދޫއިން މީހަކު ފުލުހުންގެ ބެލުމުގެ ދަށަށް ގެނެސްފި އެވެ.

މަސްތުވާތަކެތިކަމަށް ބެލެވޭ އެއްޗެއްހުރި 103 ރަބަރު ޕެެކެޓާއެކު މީހަކު މަކުނުދޫން ފުލުހުންގެ ބެލުމުގެ ދަށަށް ގެނެސްފައި ވަނީ 26 އަހަރުގެ ދިވެހި ފިރިހެނެކެވެ.

ހދ. މަކުނުދޫ ޕޮލިސް ސްޓޭޝަނުން ހިންގި އޮަޕަރޭޝަނެއްގައި މިއަދު ހެނދުނު 10:15 އޭނާ ފުލުހުންގެ ބެލުމުގެ ދަށަށް ގެނެސްފައިވަނީ މާލެއިން މަކުނުދޫއަށް އަންނަ ބޯޓަކުން މަސްތުވާތަކެތި އެތެރެކުރާކަމުގެ މަޢުލޫމާތު ފުލުހުންނަށް ލިބުމާ ގުޅިގެނެވެ. އޭނާ ހައްޔަރުކޮށްފައިވަނީ ބޯޓުން މަކުނުދޫއަށް ފޭބި ވަގުތު އެވެ.

މަސްތުވާތަކެތި ކަމަށް ބެލެވޭ ޕެކެޓްތައް ފެނިފައިވަނީ، އޭނާ ފުލުހުންގެ ބެލުމުގެ ދަށަށް ގެނެސް، އޭނާ ގެންގުޅުނު ފޮށިގަނޑެއް ބަލައި ފާސްކުރިއިރު އެވެ. އަދި މިއީ ވައްކަމާއި މާރާމާރީ ހިންގުމާއި ބަދުއަހުލާގީ ޢަމަލު ހިންގުމާއި މަސްތުވާތަކެތީގެ މައްސަލަ ތަކުގެ ރެކޯޑް އޮންނަ މީހެއް ކަމަށް ފުލުހުން މައުލޫމާތު ދެއެވެ.

މި މައްސަލަ ހދ. މަކުނުދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ