އަފީފުއްދީން ސްކޫލްގެ އާ އިމާރާތުގެ މަސައްކަތް ފަށައިފި

ކުޅުދުއްފުށީ އަފީފުއްދީން ސްކޫލްގައި އަލަށް އަޅަން ހަމަޖެހިފައިވާ 3 ބުރީގެ އާ އިމާރާތުގެ މަސައްކަތް  ފަށައިފި އެވެ.

އައިލެން ލައިން ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކޮށްގެން އަޅާ ތިން ބުރީގެ  މި އިމާރާތުގައި 9 ކްލާސްރޫމަކާއި ފާހާނާ ބްލޮކެއް އެޅުމަށް ހަމަޖެހިފައިވެ.

4.45 މިލިޔަން ރުފިޔާ ޚަރަދުކޮށްގެން އަލަށް އަޅާ މި އިމާރާތުގެ އަމަލީ މަސައްކަތް ފެށިފައިވީ ނަމަވެސް ކޮންސްޓރަކްޝަން ސައިޓުގައި މަސައްކަތް ކުރުމަށް ބައެއް ދަތިތައް ހުރި ކަމަށް ސައިޓް މެނޭޖަރު އަލީ އަހުމަދު ވިދާޅުވި އެވެ.

އޭނާ ވިދާޅުވީ ވަނީ މަސައްކަތް ކުރުމަށް ލިބިފައިވާ ޖާގަ ކުޑަވުމުންނާއި ސައިޓަށް ކަރަންޓު ލިބުމަށް ދަތިތައް ދިމާވާ ކަމަށާއި ނަމަވެސް ވީހާވެސް އަވަހަކަށް އިމާރާތް އަޅައި ނިންމާލުމުގެ މަސައްކަތް ކުރާނެކަމަށް އަލީ ވިދާޅުވި އެވެ.

އަލަށް އަޅާ މި އިމާރާތުގެ މަސައްކަތް މިއަހަރު ނިންމައި، އަންނަ އަހަރު އެ އިމާރާތް ބޭނުންކުރަން ފެށޭނެކަމަށް އުންމީދު ކުރައްވާކަމަށާއި އިމާރާތުގެ މަސައްކަތް ނިމުމުން އެ ސްކޫލަށް ދިމާވެފައިވާ ޖާގައިގެ ދަތިކަން ހައްލުވެގެން ދާނެ ކަމަށް އެޑިޔުކޭޝަން މިނިސްޓްރީގެ ޑެޕިއުޓީ މިނިސްޓަރ އިބްރާހީމް އިސްމާއިލް އަލީ ވިދާޅުވެފައި ވެއެވެ.

އަފީފުއްދީން ސްކޫލަކީ ގުރޭޑް 1 ން 10 ކިޔަވައިދޭ ސްކޫލެކެވެ.