ކުޅުދުއްފުށީ ބާސްކެޓް ކޯޓުގެ އަމަލީ މަސައްކަތް ފަށައިފި

ކުޅުދުއްފުށި ޒޯން ސްޓޭޑިއަމްގެ ބާސްކެޓް ކޯޓު އަލުން ހެދުމުގެ މަސައްކަތް އިއްޔެ ފަށައިފި އެެވެ.

ވީރާނާވެ ހަލާކުވެފައިވާ ކުޅުދުއްފުށީ ބާސްކެޓް ކޯޓް އަލުން ހަދަން މިދިޔަ ސެޕްޓެމްބަރު މަހުގެ 6 ވަނަ ދުވަހު ޔޫތު އެންޑް ސްޕޯޓްސް މިނިސްޓަރީ އިން ވަނީ ބެސްޓް ޕްރައިސް މޯލްޑިވްސްއާ ހަވާލުކޮށްފައި އެވެ.

މަސައްކަތާ ހަވާލުވެ އިސްކޮށް ހުންނެވި އަބޫބަކުރު އަލީ ކުޅުދުއްފުށި އޮންލައިނަށް މައުލޫމާތު ދެއްވަމުން ބުނެފައި ވަނީ އަލުން ހެދުމަށްވެސް ހަމަޖެހިފައި ވަނީ އައުޓްޑޯރ ކޯޓެއް ކަމަށާއި މަސައްކަތް ނިންމުމަށް 70 ދުވަސް ދީފައި ވީ ނަމަަވެސް އަމާޒަކީ ކޯޓްގެ މަސައްކަތް 1  މަސް ދުވަސް ތެރޭގައި ހަދާ ނިންމާލުން ކަމަށެވެ.

“މިއީ ކޯޓު މަރާމާތު ކުރުމުގެ މަސައްކަތެއް ނޫން ކަމަށާއި މީއީ އެ ކޯޓު ނަގާ އެތަނުގައި އާ ކޯޓެއް އެޅުމުގެ މަސައްކަތް ކަމަށް ޔޫތު އެންޑް ސްޕޯޓްސް މިނިސްޓަރުގެ ނާއިބު ނާއިފް ޝައުކަތު މީގެ ކުރިން މިނޫހަށް ދިން އިންޓަވިއުގައި ވިދާޅުވެފައި ވެއެވެ.”

ކުޅުދުއްފުށި ޒޯން ސްޓޭޑިއަމް ތެރޭގައި އަޅާ މި ކޯޓު ހެދުމަށް ހަވާލުކޮށްފައިވަނީ  1.3 މިލިއަން ރުފިޔާއަށެވެ.