ކުޅުދުއްފުށީ މަގު ހެދުމުގެ މަސައްކަތް ކުރަން ސަބް ކޮންޓްރެކްޓަރަކާ ހަވާލުކޮށްފި

މަގު ހަދަން ފަށައި މަސައްކަތް ހުއްޓިފައިވާ އޮތުމަށް ފަހު ކުޅުދުުއްފުށީގެ މަގުތައް ހެދުމުގެ މަސައްކަތް ކުރަން ސަބް ކޮންޓްރެކްޓަރަކާ ހަވާލުކޮށްފި އެވެ.

މިމަސައްކަތް ކުރަން ސަރުކާރުން ހަވާލުކޮށްފައިވާ އެމްއާރުޑީސީން މިމަސައްކަތް ސަބް ކޮންޓްރެކް އުސޫލުން ހަވާލުކޮށްފައިވަނީ ސިއެރާ ކޮމްޕެނީ ނަމަކަށް ކިޔާ ކުންފުންޏަކާ ކަމަށް ހައުސިންގ މިނިސްޓްރީ ކައުންސިލަށް ފޮނުވި ސިޓީއެއްގައި ބުނެފަވެ އެވެ.

ހައުސިންގ ގެ މި ސިޓީގައި އިތުރަށް ބުނެފައިވަނީ އެމްއާރުޑީސީ އެމިނިސްޓްރީއަށް ހުށަހެޅި ޝެޑިއުލްގައިވާ ގޮތުން ކުޅުދުއްފުށީގެ މަގުހެދުމުގެ އަމަލީ މަސައްކަތް 2015 ޑިސެމްބަރު މަހުން ފެށިގެން 2016 އޯގަސްޓްގެ ނިޔަލަށް ނިމުމަށް ތާވަލްކޮށްފައިވާ ކަމަށެވެ.

ކުޅުދުއްފުށީގެ މަގުތައް ރަގަޅު ފެންވަރަކަށް ހެދުމުގެ އަމަލީ މަސައްކަތް ފަށާފައިވަނީ 2010 ވަނަ އަހަރު އެވެ. ނަމަވެސް ރައީސް ޔާމީން ވެރިކަމަށް ވަޑައިގަތުމަށް ފަހު ކުޅުދުއްފުށިގެ މަގު ހެދުމުގެ އަމަލީ މަސައްކަތް ވަނީ ހުއްޓިފަ އެވެ.