ޕްލޭ ސްކޫލު ހިންގަން ހަމަޖެހިފައިވަނީ އަމީރު އަމީން ސްކޫލުގެ ނަމުގަ

ނާސަރީ އާއި ބޭބީ ނަސަރީގެ ދަރިވަރުންނަށް ހާއްސަކޮށްގެން އަންނަ އަހަރު ހިންގުމަށް ހަމަޖެހިފައިވާ “ޕްލޭ ސްކޫލް” ހިންގަން ހަމަޖެހިފައިވަނީ އަމީރު އަމީން ސްކޫލުގެ ނަމުގަކަމަށް ކުޅުދުއްފުށީ ކައުންސިލްގެ ރައީސް އަލީ މުހައްމަދު ވިދާޅުވެއްޖެ އެވެ.

އަލީ މިހެން ވިދާޅުވީ އެލްކޭޖީ އާއި ޔޫކޭޖީގެ ދަރިވަރުން އަންނަ އަހަރުން ފެށިގެން ސަރުކާރުގެ ސްކޫލުތަކަށް ބަދަލުކުރުމާ ބޭހޭ މައުލޫމާތު ބެލެނިވެރިންނަށް ހިއްސާކުރުމަށް ބުރާސްފަތި ދުވަހު ރޭ އަފީފުއްދީން ސްކޫލުގައި ވާހަކަ ދައްކަވަމުންނެވެ.

އަންނަ އަހަރު ނާސަރީ އާއި ބޭބީ ނާސަރީގެ ކައުންސިލުން ހިންގުމަށް ހަމަޖެހިފައިވަނީ މިހާރުގެ އައިޕީއެސް ހުންނަ އިމާރާތްގައި އަމީރު އަމީން ސްކޫލު ނަމުގަ އެވެ. އަމީރު އަމީން ސްކޫލުގެ އިމާރާތްގައި އަންނަ އަހަރު ކިޔަވައިއެއް ނުދޭނެ އެވެ. އެއިމާރާތް ދެން ބޭނުން ކުރަން ހަމަޖެހިފައިވާ ގޮތެއް ކައުންސިލުން އަދިއެއް ހާމަކޮށްފައެއް ނުވެ އެވެ.

އެ ރޭ ވާހަކަ ދައްކަވަމުން  އަލީ ވިދާޅުވީ ޔުނީފޯމަށް ބަދަލު އައުމަކީ އެކަށީގެންވާ ކަމެއް ކަމަށާއި އެކަމުގައި އަދި ގޮތެއް ނުނިންމާ ކަމަށެވެ. އޭނާ ވިދާޅުވީ ޕްލޭ ސްކޫލަށް މުވައްޒަފުން ނަގަން ހަމަޖެހިފައިވަނީ އިއުލާން ކޮށްގެން ކަމަށެވެ.

ޕްރީ ސްކޫލުގެ ދަރިވަރުން ސަރުކާރަށް ނެގުމުން ބޭބީ ނާސަރީ އާއި ނާސަރީ ގުރޭޑްތަކަށް ސަރުކާރުގެ އެއްވެސް މާލީ އެހީއެއް ނުލިބޭނެތީ އަންނަ އަހަރު އެ ދެ ގުރޭޑަށް ނަގަމުން އައި ފީ ވަނީ ބޮޑުކޮށްފަ އެވެ. އެގޮތުން 150 ރުފިޔާއިން 350 އަށް ވަނީ ފީ ބޮޑުކޮށްފަ އެވެ.

އަމީރު އަމީން ސްކޫލުގެ ބާނީ އަލްމަރުހޫމް މުހައްމަދު އަމީނު ދޮށިމޭނާކިލެގެ އަވަހާރަކޮށްލީ ރައީސް ކަމުގައި ހުންނަވަނިކޮށް ހިނގި ހަމަނުޖެހުންތަކެއްގައި 1953 ވަނަ އަހަރުގައެވެ. މިއީ ރާއްޖޭގައި 2 ވަނަ އަށް ނުވަތަ 3 ވަނަ އަށް ހުޅުވި ސްކޫލެވެ..