މަންދު ކޮލެޖުގައި އަންނަ އަހަރު ފަށާ ކޯސްތަކަށް ވަނުމުގެ ފުރުސަތު ހުޅުވާލައިފި

މަންދު ކޮލެޖުގައި 2016 ވަނަ އަހަރުގެ ޖެނުއަރީ މަހުގައި ފަށާ ކޯސްތަކަށް ވަނުމުގެ ފުރުސަތު އެ ކޮލެޖުން ހުޅުވާލައިފި އެވެ.

އަންނަ އަހަރު ފެށުމަށް ހަމަޖެހިފައިވަ ކޯސްތަކުގެ ތެރެއިން ފައުންޑޭޝަން އަދި ޑިޕްލޮމާ ފެންވަރުގެ ކޯސްތަކަށް ވަރަށް ހާއްސަ ޑިސްކައުންޓް އަގުތަކެއްގައި ލިބޭނެ ކަމަށް އެ ކޮލެޖުން ބުނެއެވެ.

އެގޮތުން 4000 ފެށިގެން 13000 ރުފިޔާ ދެމެދުގެ ޑިސްކައުންޓް އެ ކޯސްތަކުން ލިބޭނެކަމަށް އެކޮލެޖުން ބުނެއެވެ.

ޖެނުއަރީ މަހުގައި ފަށާ މިކޯސްތަކަށް ފޯމް ހުށެއެޅުމުގެ ސުންގަޑި 13 ޖެނުއަރީ 2016 ވަނަ ދުވަހުގެ 23:30ގައި ހަމަވާނެކަމަށް އެ ކޮލެޖުން ބުނެއެވެ. ނަމަވެސް ޑިސްކައުންޓް ކޯސްތަކަށް ފޯމް ހުށެއެޅުމުގެ ސުންގަޑި ހަމަވާނީ 15 ޑިސެމްބަރު 2015ގެ 23:30 ގައި ކަމަށް އެ ކޮލެޖުން ބުނެއެވެ.

މީގެ އިތުރުން އެ ކޮލެޖުންވަނީ ރާއްޖެއިން ބޭރުގެ މަޝްހޫރު ޔުނިވާސިޓީތަކާއި ގުޅިގެން މަތީ ތައުލީމު ހާސިލް ކުރުމުގެ އިތުރު ފުރުސަތުތަކެއް ތަނަވަސްކޮށްދީފައި އެވެ.

އެގޮތުން ފައުންޑޭޝަން ފޮރ ޑިގްރީ ސްޓަޑީޒް ނިންމާ ދަރިވަރުންނަށް އިނގިރޭސިވިލާތާއި މެލޭޝިއާގެ ނަން މަޝްހޫރު ޔުނިވާސިޓީތަކުން 3 އަހަރު ދުވަހުގެ ޑިގްރީ ފުރިހަމަ ކުރެވޭނެކަމަށް އެކޮލެޖުން ބުނެއެވެ. އަދި ޑިޕްލޮމާއިން ބިޒނަސް ނިންމާ ދަރިވަރުންނަށް މެލޭޝިއާ އަދި އިނގިރޭސިވިލާތުގެ ޔުނިވާސިޓީތަކުން 2 އަހަރު ދުވަހުގެ ޑިގްރީ ނިންމުމުގެ ފުރުސަތު ލިބިގެންދާނެއެވެ.

މަތީ ތައުލީމު ހާސިލް ކުރުމަށް ރާއްޖެއިން ބޭރުން ފުރުސަތު ހުޅުވާލެވިފައިވާ ޔުނިވާސިޓީތަކުގެ ތެރޭގައި ކާރޑިފް މެޓްރޮޕޮލިޓަން ޔުނިވާސިޓީ، ޔުނިވާސިޓީ އޮފް ކެމްބްރިޖް، ޔުނިވާސިޓީ އޮފް ލަންޑަން، ޔުނިވާސިޓީ އޮފް ލިވަރޕޫލް، ޔުނިވާސިޓީ އޮފް ނޮތަންބްރިއާ، އޮކްސްފޯޑް ބްރޫކްސް ޔުނިވާސިޓީ، ބަރމިންގްހަމް ސިޓީ ޔުނިވާސިޓީ އަދި ޔުނިވާސިޓީ އޮފް އީސްޓަން އެންގްލިއާ ފަދަ އިނގިރޭސިވިލާތުގެ ނަން މަޝްހޫރު ޔުނިވާސިޓީތައް ހިމެނެއެވެ. އަދި މެލޭސިއާގެ ބްރިކްފީލްޑް އޭޝިއާ ކޮލެޖް އަދި ވެސްޓް މިންސްޓަރ އިންޓަނޭޝަނަލް ކޮލެޖް ވެސް ހިމެނެއެވެ.

މީގެ އިތުރުން އެ ކޮލެޖުންވަނީ ބިޒްނަސް މެނޭޖްމަންޓް، އިންފޮމޭޝަން ޓެކްނޮލޮޖީ އަދި ޓުއަރިޒަމް އެންޑް ހޮސްޕިޓަލިޓީގެ ސެޓްފިކެޓް ލެވެލް 3 ގެ ކޯސް ހިލޭ ހިންގުމަށް ހަމަޖައްސާ އެ ކޯސްތަކަށް ވަނުމުގެ ފުރުސަތުވެސް ހުޅުވާލައިފައި އެވެ.