މަސްތުވާތަކެއްޗާއި 70 ހާހަށްވުރެ ގިނަ ރުފިޔާއާ އެކު ކުޅުދުއްފުށިން މީހަކު ހައްޔަރުކޮށްފި

Nov 8, 2015

މަސްތުވާތަކެއްޗާއި ގިނަ އަދަދެއްގެ ފައިސާ އާއެކު ކުޅުދުއްފުށިން މީހަކު ހައްޔަރުކޮށްފި އެވެ.

ފުލުހުން މައުލޫމާތު ދޭ ގޮތުގައި މި މައްސަލައިގައި ހައްޔަރުކޮށްފައިވަނީ 27 އަހަރުގެ ފިރިހެނެކެވެ.

ފުލުހުން ބުނެފައިވާ ގޮތުގައި އެ މީހާ ހައްޔަރުކޮށްފައިވަނީ ކުޅުދުއްފުށި ޕޮލިސް ސްޓޭޝަނާއި ޕޮލިސް އިންޓެލިޖެންސާ ގުޅިގެން ހިންގި އޮޕަރޭޝަނެއްގައި މިދިޔަ ހުކުރު ދުވަހުގެ ރޭ ކުޅުދުއްފުށި އިރު އުތުރުފަރާތު ގޮނޑުދޮށުންނެވެ.

މިމީހާ ހައްޔަރުކޮށް ބަލައިފާސްކުރަން އުޅުނު ވަގުތު އޭނާ އެއްލާލި އެއްޗެއް ނަގައި ބަލައިފާސްކުރިއިރު އޭގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 5 ސެލޯފިންކޮޅު ފެނިފައިވާއިރު އޭނާގެ ވޮލެޓުން 17000ރ ފެނިފައިވެއެވެ.

މީގެއިތުރުން އެމީހާ ދިރިއުޅެމުންދާ ގެ ކޯޓު އަމުރެއްގެ ދަށުން ބަލައިފާސްކުރިއިރު އެގެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 143 ސެލޯފިންކޮޅާއި މަސްތުވާތަކެތިކަމަށް ޝައްކުކުރެވޭ އެއްޗެއް ހޭކިފައިހުރި 13 ސެލޯފިންކޮޅެއް ފެނިފައިވާއިރު އެގެއިން 70600 ރުފިޔާއަށްވުރެ ގިނަ ފައިސާ ފެނިފައިވާ ކަމަށް ފުލުހުން މައުލޫމާތު ދެއެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން ތަހުގީގު ކުރަމުން އަންނައިރު، އޭނާގެ ބަންދުގެ މުއްދަތަށް 7 ދުވަސް ވަނީ ޖަހައިދީފައެވެ.

މިލިޔުމާއި ގުޅޭ