އަންނަ އަހަރު މުޅި ރާއްޖޭގައި ފަށާ އާ މަންހަޖަށް ޓީޗަރުން އަހުލުވެރި ކުރުމުގެ ގޮތުން ތަމްރީން ޕްރޮގުރާމެއް ހދ އަތޮޅުގައި ފަށައިފި އެވެ.
ރާއްޖޭގެ ހުރިހާ ސަރަހައްދެއްގައިވެސް ގުރޭޑް 4 ، 5 އަދި 6 ގައި (ކީ ސްޓޭޖް 2) ކިޔަވައިދެމުންދާ ޓީޗަރުން ހާއްސަކޮށްގެން ކުރިޔަށް ގެންދާ ތަމްރީން ޕްރޮގުރާމް މިދިޔަ މަހުގެ 28 ވަނަ ދުވަހު ވަނީ ހދ އަތޮޅު ތައުލީމީ މަރުކަޒުގައި ފަށާފައި އެވެ.
މި ތަމްރީން ޕްރޮގުރާމްގައި ޓީޗަރުންނަށް އަލަށް ފަށާ މަންހަޖުގެ މާއްދާތަކުގައި ހިމެނޭ ސިލަބަސްތަކަށް މުޅި މަންހަޖުގައި މައިގަނޑު ގޮތެއްގައި އެކުލެވިގެންވާ ބައިތަކާއި ކިޔަވައި ދިނުމަށް ގެންނަން ޖެހޭ ބަދަލު ތަކުގެ މައުލޫމާތު ދެވިގެންދާނެ ކަމަށް ހދ އަތޮޅުގެ ޓީޗަރ އެޑިއުކޭޓަރ އަބްދުއްރަޝީދު ސައީދު ކުޅުދުއްފުށި އޮންލައިނަށް މައުލޫމާތު ދިނެވެ.
އަބްދުއްރަޝީދު ވިދާޅުވީ މި ތަމްރީން ޕްރޮގުރާމް އިތުރު ތިން ރަށެއްގެ ސްކޫލްގައިވެސް ކުރިޔަށް ދާނެ ކަމަށެވެ. އެއީ ނޮޅިވަރަމް ސްކޫލާއި ނޮޅިވަރަމްފަރު ސްކޫލް އަދި ވައިކަރަދޫ ސްކޫލްގައި އެވެ.
ހދ އަތޮޅުގެ 4 ސްކޫލްގައި މި ޕްރޮގުރާމް ނިމިގެންދާއިރު ޖުމްލަ 213 ޓީޗަރަކު ތަމްރީން ވެގެންދާނެކަމަށް އަބްދުއްރަޝީދު ފާހަގަ ކުރެއްވިއެވެ.
9 ޓްރެއިނަރަކާ އެކު ކުރިޔަށް ދާ މި ތަމްރީން ޕްރޮގުރާމަކީ 35 ގަޑިއިރަށް ބަހާލައިގެން ކަމަށާއި މި ވޯރކްޝޮޕްގައި ސެޝަން ޕްލޭން ކުރާނެ ގޮތާއި މައްދާތަކުގައި ޕްރެކްޓިކަލް އެކްޓިވިޓީސް ހިމެނިދާނެ ގޮތުގެ މައުލޫމާތުވެސް ދެވިފައިވާނޭ ކަމަށް އަބްދުއްރަޝީދު ވިދާޅުވި އެވެ.
އަބްދުއްރަޝީދު ވިދާޅުވާގޮތުގައި ރާއްޖޭގެ މަންހަޖު ބަދަލުވެގެން ދާއިރު މިއީ ޓީޗަރުން ކުރަން މަޖުބޫރު ކަމެއް ކަމަށާއި ކުރީގައި ނުފެންނަށް ގޮތަކަށް މަންްހަޖު ބަދަލުވެގެން ދާއިރު ޓީޗަރުން ކިޔަވައިދިނުމުގައި ބަދަލުވެގެން އަންނާނެ ވައްޓަފާޅިއަށް ތަމްރީން ކުރުމަކީ ކޮންމެހެންވެސް މުހިންމު ކަމެއް ކަމަށެވެ.
އެގޮތުން އަންނަ އަހަރު ހދ އަތޮޅުގައި ކީ ސްޓޭޖް 2 ގެ ހުރިހާ ޓީޗަރުންނަކީ އާ މަންހަޖަށް ކިޔަވައި ދިނުމުގެ ތަމްރީން ލިބިފައިވާ ޓީޗަރުންކަމުގެ ޔަގީންކަން އަބްދުއްރަޝީދު ވަނީ ދެއްވާފައިއެވެ.
