ލޯންޗު އެކްސިޑެންޓްގައި ސީރިއަސް އަނިޔާވި މީހުން ކުޅުދުއްފުށީ ހޮސްޕިޓަލަށް ގެންނަނީ

މިއަދު ހަވީރު 6:30 ހާއިރު ހަނިމާދޫން ކުޅުދުއްފުއްޓަށް ނައްޓާލި ލޯންޗަކާއި ހަނިމާދޫ އެއާޕޯޓަށް މީހުން ބަލައި ދިޔަ ލޯންޗަކާ ޖެހި ހިނގި ނުރައްކާތެރި އެކްސިޑެންޓްގައި ސީރިއަސް އަނިޔާވި މީހުން ކުޅުދުއްފުށީ ރީޖަނަލް ހޮސްޕިޓަލަށް ބަދަލުކުރުމުގެ މަސައްކަތް ފަށައިފި އެވެ.

ލޯންޗް އެކްސިޑެންޓްގައި އެވަގުތު ލޯންޗުގައި ތިބި ހުރިހާ މީހުންނަށްވެސް ވަނީ އެކި ވަރުގެ އަނިޔާވެފަ އެވެ. އެގޮތުން 6 މީހަކަށް ވަނީ އަނިޔާވެފަ އެވެ. ސީރިއަސް އަނިޔާތަކެއް ލިބިފައިވަނީ އޭގެތެރެއިން 3 މީހަކަށެވެ. އެއީ ކުޅުދުއްފުށީ 2 މީހަކާއި ހިރިމަރަދޫ މީހެކެވެ

ސީރިއަސް އަނިޔާވި މީހުން ބަލައި ދެންމެ ކުޅުދުއްފުށިން ހަނިމާދޫއަށް ސީއެމްބިއުލާންސް ދިޔައީ ޑޮކްޓަރެއްވެސް ނުލަ އެވެ. ސީރިއަސް އަނިޔާވި ބައެއް މީހުނަށް ފަސްޓްއެއިޑް ދެވިފައިވާއިރު ބޯ ފަޅައިގެން ގޮސް ބޮލުގައި ބޭސް އަޅަފައިވާ މީހެއްގެ ބޮލުން ލޭ އަންނަމުން ދާކަމަށް މައުލޫމާތު ލިބެއެވެ.

އެކްސިޑެންޓްގައި އަނިޔާވި މީހުން ހަނިމާދޫ ސިއްހީ މަރުކަޒުން ނެރެގެން ގެންދަނީ–ކުޅުދުއްފުށި އޮންލައިން ފޮޓޯ:އަނާން

އެމީހުން ކުޅުދުއްފުށީގައި ހުންނަ ރީޖަނަލް ހޮސްޕިޓަލަށް ގެނައި ކަމުގައިވީނަމަވެސް “އިތުރު ރަނގަޅު” ފަރުވާއެއް ދެވެން ނެތްކަމަށާއި ހަނިމާދޫ މަގުން މާލެ ފޮނުވާނުލައި އަނެއްކާ ކުޅުދުއްފުއްޓަށް ގެންނާތީ ބަނދަރު ސަރަހައްދަށް އެއްވެފައި ތިބި ގިނަ ބަޔަކު ވަނީ ސުވާލު އުއްފަދާފަ އެވެ.

މިރޭ އިރާކޮޅު ހިނގި މި އެކްސިޑެންޓްގައި ޖެހުނު ދެ ލޯންޗުވެސް ހާދިސާ ހިނގިތާ ކުޑަވަގުތުކޮޅެއްގެ ތެރޭގައި އަޑިއަށް ގޮސްފައިވާކަމަށް ހަބަރުލިބެއެވެ. ދެ ލޯންޗުގައި ދަތުރުކުރި އެންމެނަށް ވެސް އަނިޔާވެފައިވާއިރު އެކަކުގެ ލޯމަތި ފަޅައިގެންގޮސް އެހެން މީހެއްގެ ކޮނޑު ހުޅުން ނެއްޓިފައިވާ ކަމަށްވެސް މައުލޫމާތު ލިބެއެވެ. އަދި އެކެއްކެ ފައި ބިންދައިގެން ގޮސް ސީރިއަސް އަނިޔާތަކެއް ވަނީ ލިބިފަ އެވެ.