ލޯންޗު އެކްސިޑެންޓްގައި ހާލު ސީރިއަސްވި މީހާ މާލެ ފޮނުވާލަނީ

ހދ. ހަނިމާދޫ ނެރުމަތީގައި ދެ ލޯންޗު ޖެހި އިއްޔެ ހިނގި އެކްސިޑެންޓްގައި ހާލު ސީރިއަސްވި މީހާ މާލެ ފޮނުވާލުމުގެ މަސައްކަތް ފަށައިފި އެވެ.

31 އަހަރުގެ މި މިހާއަށް މިހާރުވެސް ފަރުވާދެމުން އަންނަނީ ކުޅުދުއްފުށީ ރީޖަނަލް ހޮސްޕިޓަލްގެ އައިސީޔޫގަ އެވެ. ކުޅުދުއްފުށި އޮންލައިނަށް އެގިފައިވާގޮތުގައި އެމީހަކީ ކުޅުދުއްފުށީ ފަތިސް، އަލީ ހުސެއިން އެވެ.

“ކުޅުދުއްފުށި އޮންލައިނަށް” މައުލޫމާތު ދެއްވަމުން އެ ހޮސްޕިޓަލުގެ އިންފޮމޭޝަން އޮފިޝަލް ހަސަން ހުސެއިން ވިދާޅުވީ އިއްޔެގެ އެކްސިޑެންޓްގައި އަނިޔާވި 6 މީހަކަށް މިހާރުވެސް ފަރުވާދެމުން އަންނަ ކަމަށާއި އެތަނުން އެކަކުގެ ހާލު ސީރިއަސް ކަމަށެވެ. އަދި އޭނާ މާލެ ފޮނުވާލުމުގެ މަސައްކަތް ކުރަމުން އަންނަކަމަށް ހަސަން ވިދާޅުވި އެވެ.

އޭނާ ވިދާޅުވީ ހާލު ސީރިއަސްވި މީހާގެ ކަންފަތުންނާއި ނޭފަތުން ލޭ އަންނަ ކަމަށާއި ބޮލަށްވެސް އަނިޔާތަކެއް ލިބިފައިވާކަމަށެވެ. އަދި “ކުލެވިކަލް”ގައި ފްރެކްޗާވެސް ހުރިކަމަށް ޑޮކްޓަރުންނާ ހަވާލާދީ ހަސަން ވިދާޅުވި އެވެ. އޭނާ މާލެ ފޮނުވާލަނީ ކޮންމެ ދޭ ޖެހޭ އިތުރު ފަރުވާދިނުމަށް ކަމަށް ހަސަން ވިދާޅުވި އެވެ.

ހަސަން ވިދާޅުވީ ފުލައިޓުން ޖާގަ ލިބުނުހާ އަވަހަކަށް އޭނާ ފޮނުވާލެވޭނެ ކަމަށެވެ.

ހާލު ސީރިއަސްވި މީހާގެ އިތުރުން، އިތުރު ދެ މީހަކަށްވެސް ބޮޑެތި އަނިޔާތަކެއް ލިބިފައިވާ ކަމަށެވެ. އެގޮތުން އެކި ތަންތަން ބިންދައިގެން ގޮސްފައިވާއިރު ބޯ ފެޅި އެކި ވަރުގެ އަނިޔާތައް ވެފައިވާ ކަމަށް ހަސަން ވިދާޅުވި އެވެ.

އެކްސިޑެންޓް ހިނގީ އިއްޔެ ހަވީރު 6:30 ހާއިރު ހަނިމާދޫން ކުޅުދުއްފުއްޓަށް ނައްޓާލި، ކުޅުދުއްފުށީ މަރިޔާޒް ލޯންޗަކާއި ހަނިމާދޫ އެއާޕޯޓަށް މީހުން ބަލައި ދިޔަ ހިރިމަރަދޫ ލޯންޗެއް ޖެހި އެވެ.

މިއެކްސިޑެންޓްގައި 2 ލޯންޗަށް ވެސް ވަނީ ބޮޑެތި ގެއްލުންވެފައި އެވެ. އަދި ކުޑަ ވަގުތުކޮޅެއް ތެރޭގައި 2 ލޯންޗުވެސް ވަނީ އަޑިއަށް ގޮސްފަ އެވެ.