އާ ނޫޓް ސީރީޒާ ގުޅޭގޮތުން މައުލޫމާތު ދިނުމުގެ ޕްރޮގްރާމެއް ކުޅުދުއްފުށީގައި ފަށައިފި

އަންނަ މަހުން ފެށިގެން ބޭނުން ކުރަން ފަށާ ދިވެހި ރުފިޔާގެ އާ ނޫޓް ސީރީޒާ ބެހޭ ގޮތުން އާންމުންނަށް މައުލޫމާތު ދިނުމުގެ ޕްރޮގްރާމުތަކެއް އެމް.އެމް.އޭ އިން ކުޅުދުއްފުށީގައި ފަށައިފި އެވެ.

“ކުޅުދުއްފުށީ އޮންލައިނަށް” މައުލޫމާތުދެމުން އެމް.އެމް.އޭ ގެ އޮފިސަލަކު ވިދާޅުވީ އާ ނޫޓް ސީރީޒާ ބެހޭގޮތުން އާންމުނަށް މައުލޫމާތު ދިނުމަށް ކުޅުދުއްފުށީގައި ކުރިއަށް ގެންދާ ޕްރޮގްރާމް ފަށާފައިވަނީ މިއަދު ކަމަށެވެ.

އެގޮތުން އެމް.އެމް.އޭ ގެ ޓީމުން ވަނީ މިއަދު ކުޅުދުއްފުށީ ހޮނިހިރު ބާޒާރު ސަރަައްދުގައި އާ ނޫޓް ސީރީޒާ ބެހޭގޮތުން މައުލޫމާތު ދީފައެވެ. އަދި މިއަދު ހަވީރު ވެސް ކުޅުދުއްފުށީގެ އެކި ސަރަހައްދުތަކުގައި މައުލޫމާތު ދިނުމާއި ޑޯޓުޑޯ ކުރިއަށްދާނެ ކަމަށް އެމް.އެމް.އޭ އިން މައުލޫމާތު ދެއެެވެ.

އެމްއެމްއޭ އިން ބުނީ މައުލޫމާތު ދިނުމުގެ ޕްރޮގްރާމުގެ ތެރެއިން ނޫޓްތައް ބަލާލުމުގެ ފުރުސަތު ލިބުމުގެ އިތުރުން ނޫޓްތަކުގެ ސަލާމަތީ ސިފަތަކާ ބެހޭ މައުލޫމާތު ވެސް އާންމުންނަަށް ދޭނެ އެވެ. އަދި ނޫޓް ސީރީޒާ ބެހޭ ގޮތުން ކުރާ ސުވާލުތަކަށް އެމްއެމްއޭގެ މުވައްޒަފުން ޖަވާބު ވެސް މި ޕްރޮގްރާމްގެ ތެރެއިން ދޭނެ އެވެ

މަރުކަޒީ ބޭންކް އެމް.އެމް.އޭ އިން ބުނީ މައުލޫމާތު ދިނުމުގެ ސެޝަންއެއް މިރޭ 8:30 ގައި ކުޅުދުއްފުށީ އަފީފުއްދީން ސްކޫލް ހޯލްގައި އޮންނާނެ ކަމަށެވެ.

ދެ ދުވަހަށް ކުރިއަށްގެންދާ މި ޕްރޮގްރާމްގައި އެމް.އެމް.އޭ ގެ ޓީމާއެކު ބޭންކް އޮފް މޯލްޑިވްސް ކުޅުދުއްފުށީ ބްރާންޗް ގެ މުވައްޒަފުންވެސް ހަރަކާތްތެރި ވެއެވެ

މިނިވަން 50 އާ ގުޅުވައިގެން “ރަންދިހަ ފަހެއް”ގެ ނަމުގައި ތައާރަފު ކުރި ނޫޓް ސީރީޒްގައި ހިމެނެނީ 10، 20، 50، 100 500 އަދި ފުރަތަމަ ފަހަރަށް ތައާރަފު ކުރި 1،000ރ. ގެ ނޫޓެވެ.